বেলাৰুছত শান্তি আলোচনা আৰম্ভ; কি কি বিষয়ক লৈ হ’ব আলোচনা

ডিজিটেল ডেস্ক : ৰাছিয়া-ইউক্ৰেইনৰ সংঘাতৰ অৱসান বিচাৰি আলোচনা ৰ বাট মুকলি কৰা হৈছে। ৰক্তক্ষয়ী সংঘাতৰ পাছত দেশ দুখনে এতিয়া আলোচনা ৰ বাবে খোজ আগবঢ়াইছে। চুবুৰীয়া দেশ বেলাৰুছত আলোচনাৰ বাবে উপস্থিত হৈছে ৰাছিয়া আৰু ইউক্ৰেইনৰ প্ৰতিনিধি দল। দুখন হেলিকপ্টাৰেৰে দুয়োখন দেশৰ প্ৰতিনিধিয়ে ইতিমধ্যে উপস্থিত হৈছে বেলাৰুছত। বিধ্বংসী যুদ্ধই ইউক্ৰেইনক অস্থিৰ কৰি ৰখাৰ মাজতে এতিয়া আলোচনাৰ জৰিয়তে এই সংকটৰ সমাধানৰ বাট বিচৰাৰ চেষ্টা কৰা হৈছে। মন কৰিবলগীয়া যে, যিসময়ত ইউক্ৰেইনৰ পথে পথে ৰুছ সৈন্যৰ প্ৰৱল আগ্ৰাসন অব্যাহত আছে তথা বিভিন্ন স্থানত বিধ্বংসী মাৰণাস্ত্ৰৰ আক্ৰমণ অব্যাহত আছে সেই সময়তে শান্তি আলোচনা এক অখজা বিষয় হৈ পৰে। এনে পৰিপ্ৰেক্ষিততে ন্যায্যভাৱেই ইউক্ৰেইনে দুটা দাবী কৰিছে। সেই দুটা দাবী হৈছে তাৎক্ষণিতকভাৱে যুদ্ধ বিৰতি ঘোষণা কৰা আৰু ইউক্ৰেইনৰ পৰা ৰুছ সৈন্য অপসাৰণ কৰা। এই দুটা দাবী সুস্থিৰ আলোচনাৰ বাবে নিশ্চয় অতি প্ৰাসংগিক আৰু প্ৰয়োজনীয় দাবী। এফালে অস্ত্ৰৰ জনজননি চলি থাকিলে আনফালে কিদৰে শান্তি আলোচনা অনুষ্ঠিত কৰাটো সম্ভৱপৰ হ’ব? ইউক্ৰেইনৰ এই দাবীৰ প্ৰতি ৰাছিয়াই এতিয়ালৈকে সঁহাৰি দিয়া দেখিবলৈ পোৱা হোৱা নাই। তেওঁলোকে এখন চুক্তিহে স্বাক্ষৰ কৰিব বিচাৰিছে। ইতিমধ্যে বেলাৰুছ সীমান্তত এই আলোচনা আৰম্ভ হৈছে। এই আলোচনাত ইউক্ৰেইনৰ ফালৰ পৰা অংশগ্ৰহণকাৰীসকল হৈছে, ছাৰ্ভেণ্ট অব দ্য পিপুলৰ অধ্যক্ষ ডেভিড আৰাখামিয়া। ইউক্ৰেইনৰ প্ৰতিৰক্ষামন্ত্ৰী অ’লেকক্সি ৰেজনিকোভ ৰাষ্ট্ৰপতি কাৰ্যালয়ৰ মু্খ্য পৰামৰ্শদাতা মিখাইল প’ড’লায়ক, তৃপাক্ষিক আলোচনা গোটৰ ইউক্ৰেইনৰ প্ৰতিনিধি দলৰ প্ৰথমগৰাকী উপ-মুৰব্বী আণ্ড্ৰে কোষ্টিন, সাংসদ ৰুষ্টম উমেৰভ, ইউক্ৰেইনৰ বিদেশ মন্ত্ৰালয়ৰ সহযোগী মন্ত্ৰী নিকোলাই তকিটস্কি। এই আলোচনাত দুয়ো দেশৰ মাজৰ সংঘাত নিৰসনৰ বিষয়টোৱে আগস্থান লাভ কৰাৰ লগতে দুয়ো দেশৰ মাজৰ দীৰ্ঘদিনীয়া সংঘাতৰ বিষয় কিছুমানো উত্থাপন কৰা হ’ব বুলি জানিব পৰা গৈছে। এই সম্পৰ্কীয় সকলো শেহতীয়া তথ্য আমি দি থাকিব আপোনালোকক।