ডিজিটেল ডেস্কঃ যদিও ক্ৰিকেট বিশ্বত নেপাল শিশুসদৃশ, তথাপিও ভাৰতৰ বিৰুদ্ধে সন্তোষজনক বেটিং প্ৰদৰ্শন কৰে দেশখনৰ যুৱ ক্ৰিকেটাৰসকলে। সোমবাৰে এছিয়া কাপৰ মেচত ভাৰতৰ বিৰুদ্ধে নেপালৰ ক্ৰিকেটাৰসকলে আত্মবিশ্বাস অৰ্জন কৰে।
নেপালৰ খেলুৱৈ আছিফ শইখ আৰু সোমপাল কামিয়ে খেলৰ অন্তত ছচিয়েল মিডিয়াত ভাৰতৰ ছুপাৰষ্টাৰ বিৰাট কোহলীৰ সৈতে ছবি পোষ্ট কৰে। আছিফে কোহলীৰ সৈতে ফটো তুলি ‘উইথ দ্য মেন হু ৰুলছ দ্য ক্ৰিকেটিং কিংডম’ বুলি কেপচন দিয়ে। তাত দেখা গৈছে যে সোমপাল কামিয়ে তেওঁৰ বুটত কোহলীৰ অটোগ্ৰাফ লাভ কৰে, আৰু তাৰ পিছত অটোগ্ৰাফযুক্ত বুটখনৰ ছবি তেওঁৰ টুইটাৰ হেণ্ডেলত লগায়।
‘বিৰাট কোহলী কেৱল এজন ক্ৰিকেটাৰ নহয়, তেওঁ এজন আৱেগ।’ কামীয়ে কোহলীৰ সৈতে হোৱা মত বিনিময়ৰ বিষয়ে এইদৰে লিখিছে।
ভাৰতৰ বিৰুদ্ধে ১০ উইকেটত পৰাস্ত হৈ নেপালে এছিয়া কাপ ২০২৩ৰ অভিযান সমাপ্ত কৰাৰ পাছত নেপালৰ অধিনায়ক ৰোহিত পৌডেলে প্ৰকাশ কৰে যে তেওঁৰ দলটোৱে ভাৰতীয় অধিনায়ক ৰোহিত শৰ্মা আৰু বেটছমেন কোহলীৰ সৈতে কথা পাতিছিল যিটো এক উপযোগী কথা-বতৰা আছিল।
মেচৰ পিছৰ সংবাদমেলত নেপালৰ অধিনায়কে কয় যে আমি ৰোহিত আৰু বিৰাটৰ সৈতে কথা পাতিলোঁ আৰু তেওঁলোকে আমাৰ সৈতে তেওঁলোকৰ অভিজ্ঞতা ভাগ কৰিলে আৰু ই আমাৰ বাবে অতি উপযোগী হ’ব।
তেওঁ কয়- ‘সামগ্ৰিকভাৱে মই মোৰ দলৰ প্ৰদৰ্শনত বিশেষকৈ বেটিঙত সুখী। মই ভাবো অ’পেনাৰসকলে বহুত ভাল কাম কৰিলে। মধ্যম ক্ৰমত আমি আৰু ভাল কৰিব পাৰিলোঁহেঁতেন। মই ভাবিলোঁ ক’ৰবাত ২৬০-২৭০ৰ ওচৰত ভাল স্ক’ৰ হ’লহেঁতেন৷ যদি আপুনি সামগ্ৰিকভাৱে কথা কয়, তেন্তে মই প্ৰদৰ্শনত সুখী।”
Continue Reading
