ডিজিটেল ডেস্কঃ ভাৰতত অনুষ্ঠিত হ’বলগীয়া এদিনীয়া বিশ্বকাপৰ দল ঘোষণা কৰিছে দক্ষিণ আফ্ৰিকাই। কুইণ্টন ডি কক সেই দলটোত আছে। কিন্তু তেওঁ বিশ্বকাপৰ পূৰ্বে অৱসৰৰ কথা ঘোষণা কৰিছিল। উইকেটকীপাৰ-বেটছমেনগৰাকীয়ে বিশ্বকাপৰ পাছত এদিনীয়া ক্ৰিকেটৰ পৰা অৱসৰ ল’ব।
ডি ককৰ অৱসৰৰ কথা ঘোষণা কৰিছে দক্ষিণ আফ্ৰিকাৰ ক্ৰিকেট ব’ৰ্ডে। এক বিবৃতিত তেওঁলোকে কয় যে, “বিশ্বকাপৰ লগে লগে ডি’ককে এদিনীয়া ক্ৰিকেটৰ পৰা অৱসৰ লোৱাৰ মনস্থ কৰিছে। আমি তেওঁৰ সিদ্ধান্তক আদৰণি জনাইছো। কিন্তু আশা কৰিছো যে অনাগত দিনত ডি’ককে দক্ষিণ আফ্ৰিকাৰ হৈ টি-২০ ক্ৰিকেট খেলিব।’’
ইয়াৰ পূৰ্বে ২০২১ চনৰ ডিচেম্বৰ মাহত টেষ্ট ক্ৰিকেটৰ পৰা অৱসৰ লোৱাৰ কথা ঘোষণা কৰিছিল ডি ককে। ভাৰতৰ বিৰুদ্ধে শৃংখলাৰ মাজভাগতে হঠাতে তেওঁ নিজৰ সিদ্ধান্তৰ কথা ঘোষণা কৰে। সেই সময়ত ডি ককে কৈছিল যে তেওঁ পৰিয়ালৰ সৈতে অধিক সময় কটাবলৈ এই সিদ্ধান্ত লৈছিল। অৱশ্যে ডি ককে এদিনীয়া ক্ৰিকেটৰ পৰা কিয় অৱসৰ ল’ব বিচাৰে সেই সন্দৰ্ভত একো কোৱা নাছিল।
বগা বল ক্ৰিকেটত দক্ষিণ আফ্ৰিকাৰ আশাৰ নাম ডি’কক। তেওঁ দলটোৰ হৈ ১৪০ খন এদিনীয়া মেচ খেলি ৫৯৬৬ ৰান সংগ্ৰহ কৰে। এই বাওঁহাতৰ ক্ৰিকেটাৰগৰাকীয়ে গড়ে ৪৪.৮৬ ৰান আৰু ষ্ট্ৰাইক ৰেট ৯৬.০৮ ৰান সংগ্ৰহ কৰে। তেওঁ ১৭ শতক ৰান কৰে।
Continue Reading
