বিবাহৰ বাবে চৰকাৰে দিয়ে ৫১হাজাৰ; হোৰাহোৰে ওলাল ভুৱা দৰা-কইনা... তাৰ পাছত?

ডিজিটেল ডেস্ক : এইবাৰ বিবাহ বিতৰ্কই তোলপাৰ লগাইছে এখন বিজেপিশাসিত ৰাজ্যত। ভুৱা বিবাহেৰে চৰকাৰী আঁচনিৰ ধন সৰকাই নিয়াৰ ঘটনা পোহৰলৈ অহাৰ পাছতে তীব্ৰ চাঞ্চল্যৰ সৃষ্টি হৈছে ৰাজ্যখনত। এই ঘটনা সংঘটিত হৈছে মধ্যপ্ৰদেশত। ৰাজ্যখনৰ এখন জিলাতে কেইবা হাজাৰো কাগজে-কলমে হোৱা ভুৱ বিবাহৰ তথ্য পোহৰলৈ অহাৰ পাছতে তীব্ৰ চাঞ্চল্যৰ সৃষ্টি হৈছে। এই বিতৰ্কই এতিয়া মুখ্যমন্ত্ৰী শিৱৰাজ সিং চৌহান চৰকাৰক অস্বস্তিত পেলোৱা পৰিলক্ষিত হৈছে। বিৰোধী দল কংগ্ৰেছে ইয়াক ৰাজ্যজোৰা কেলেংকাৰী আখ্যা দিছে। কিন্তু চৰকাৰে এই সন্দৰ্ভত প্ৰতিক্ৰিয়া প্ৰকাশ কৰি কৈছে যে, যদিহে তেনেধৰণৰ কোনো কেলেংকাৰী সংঘটিত হৈছে তেন্তে ৰাজ্য চৰকাৰে শূন্য সহনশীল নীতিৰে কাৰ্যব্যৱস্থা গ্ৰহণ কৰিব আৰু চৰকাৰী ব্যৱস্থাৰ ত্ৰুটি ধৰ পৰা মাত্ৰকে ব্যৱস্থা গ্ৰহণ কৰিব। ঘটনা সংঘটিত হৈছে মুখ্যমন্ত্ৰীৰ ‘মুখ্যমন্ত্ৰী কন্যা বিবাহ/ নিকাহ যোজনা’ক কেন্দ্ৰ কৰি। এই আঁচনিৰ জৰিয়তে ৰাজ্যখনৰ গৃহনিৰ্মাণ আৰু অন্যান্য নিৰ্মাণকাৰ্যত জড়িত শ্ৰমিকসকলক সকাহ দিয়াৰ বাবে ব্যৱস্থা গ্ৰহণ কৰা হৈছিল। অৰ্থনৈতিকভাৱে পিছপৰা এইসকল লোকৰ কন্যাৰ বিবাহত সহায়ক হোৱাকৈ ৫১হাজাৰকৈ চৰকাৰী অনুদান এই আঁচনিৰ জৰিয়তে দিয়াৰ ব্যৱস্থা কৰা হৈছিল। কিন্তু এই আঁচনিৰ নামতে সংঘটিত হৈছে ব্যাপক অনিয়ম। ৰাজ্যখনৰ ইক’নমিক অ’ফেঞ্চেজ উইঙৰ এটা তদন্তত পোহৰলৈ আহিছে যে, একাংশ মধ্যভোগীয়ে এই আঁচনিৰ সুবিধা আদায়ৰ বাবে কূটকৌশলৰ সহায় লৈছিল আৰু একাংশ দুখীয়া গাঁওবাসীক প্ৰতাৰণাৰে তেওঁলোকৰ জালত সুমোৱাই লৈছিল। তেওঁলোকৰ বেংক ডিটেইল আৰু অন্যান্য তথ্য সংগ্ৰহ কৰাৰ জৰিয়তে কেলেংকাৰী সংঘটিত কৰিছিল এইসকল মধ্যভোগীয়ে। এখন জিলাতে এই আঁচনিৰ সুবিধা ৫০০০তকৈও অধিক দম্পতীয়ে লাভ কৰিছে। যাৰ ভিতৰত বহুতৰে অস্তিত্বই নাই। জানিব পৰা মতে বহু চৰকাৰী বিষয়া-কৰ্মচাৰীৰ আত্মীয়ও এই কেলেংকাৰীত জড়িত আছে।