ডিজিটেল ডেস্কঃ এগৰাকী বিজেপি নেত্ৰীৰ বিৰুদ্ধে অশালীন মন্তব্য কৰি গ্ৰেপ্তাৰ হ’বলগীয়া হ’ল ডিএমকেৰ এজন নেতা। ডিএমকেৰ প্ৰাক্তন মুখপাত্ৰ শিৱাজী কৃষ্ণমূৰ্তিক বিজেপি নেত্ৰীগৰাকীৰ বিৰুদ্ধে অপমানজনক মন্তব্য কৰাৰ বাবে দলৰ পৰা বহিষ্কাৰ কৰা হৈছিল। তেওঁ সকলো দলীয় পদ হেৰুওৱাৰ পিছত তামিলনাডু আৰক্ষীয়ে তেওঁক গ্ৰেপ্তাৰ কৰে।
তেওঁৰ বিৰুদ্ধে ভাৰতীয় দণ্ডবিধিৰ অধীনত ইচ্ছাকৃতভাৱে শান্তি ভংগৰ অভিযোগ উত্থাপন কৰা হৈছে। এই বছৰৰ জানুৱাৰীত ডিএমকে নেতাজনে তামিলনাডুৰ ৰাজ্যপালৰ বিৰুদ্ধেও অপমানজনক মন্তব্য কৰিছিল। সেই সময়ত তেওঁক কিছু দিনৰ বাবে দলৰ পৰা নিলম্বিত কৰা হৈছিল।
কেইদিনমান আগতে ডিএমকে নেতা কৃষ্ণমূৰ্তিয়ে অভিনেত্ৰী আৰু ৰাজনীতিক খুছবু সুন্দৰৰ বিৰুদ্ধে কেইবাটাও অপমানজনক মন্তব্য কৰিছিল। তেওঁ কৰা মন্তব্যৰ ভিডিঅ' ভাইৰেল হৈ পৰিছিল। ইয়াৰ পিছতে খুছবুৱে টুইট কৰি কৈছে, "এনে মন্তব্য কৰি কেৱল মোকেই নহয়, আন নেতাকো অপমান কৰা হৈছে। যদি আপুনি এইটো স্বীকাৰ কৰে, আপোনাৰ দলটোৱেই লোকচান ভৰিব। যদি আপোনাৰ পৰিয়ালৰ এগৰাকী মহিলাকলৈ এনে মন্তব্য কৰা হ'লহেঁতেন, তেন্তে আপুনি সেয়া গ্ৰহণ কৰিব পাৰিলেহেঁতেন নে?"
তামিলনাডু ৰাজ্যিক বিজেপি নেতৃত্বয়ো ঘটনাটোক লৈ ডিএমকেৰ বিৰুদ্ধে সৰব হৈ পৰিছে।
দলৰ পৰা বহিষ্কাৰ হোৱাৰ কেইঘণ্টামানৰ ভিতৰতে ডিএমকে নেতাজনক গ্ৰেপ্তাৰ কৰা হৈছে। তেওঁৰ বিৰুদ্ধে ভাৰতীয় দণ্ডবিধিৰ কেইবাটাও ধাৰাৰ অধীনত গোচৰ ৰুজু কৰা হৈছে, যাৰ ভিতৰত এটা হৈছে শান্তি ভংগ কৰাৰ চেষ্টা। ডিএমকে নেতাজনৰ বিৰুদ্ধে ইচ্ছাকৃতভাৱে অপমানজনক মন্তব্য কৰাৰ অভিযোগ উত্থাপিত হৈছে।
Continue Reading
