ডিজিটেল ডেস্ক: কংগ্ৰেছৰ প্ৰাক্তন সভানেত্ৰী ছোনিয়া গান্ধীৰ জন্ম দিনৰ পূৰ্বে ৮ ডিচেম্বৰ দেওবাৰে বিজেপিয়ে বৰিষ্ঠ নেতাগৰাকীৰ বিৰুদ্ধে অভিযোগ উত্থাপন কৰিছে যে তেওঁ আমেৰিকাৰ ব্যৱসায়ী জৰ্জ ছ’ৰ’ছ ফাউণ্ডেশ্যনৰ পুঁজিৰে চলি থকা এটা সংগঠনৰ সৈতে সম্পৰ্ক আছে৷ যিটো সংগঠনে স্বাধীন কাশ্মীৰৰ ধাৰণাক সমৰ্থন কৰিছে। এক্সৰ এটা প’ষ্টৰ জৰিয়তে ছোনিয়া গান্ধীৰ সৈতে এই সম্পৰ্কই ভাৰতৰ আভ্যন্তৰীণ বিষয় সমূহত বহিৰাষ্ট্ৰৰ প্ৰভাৱক প্ৰতিফলিত কৰিছে বুলি অভিযোগ উত্থাপন কৰিছে বিজেপিয়ে৷
প্ৰাপ্ত তথ্য অনুসৰি ছোনিয়া গান্ধী ফ’ৰাম অৱ ডেম’ক্ৰেটিক লিডাৰ্ছ ইন এছিয়া-পেচিফিক (এফডিএল-এপি) ফাউণ্ডেশ্যনৰ সহ-সভাপতি যিটো জৰ্জ ছ’ৰ’ছ ফাউণ্ডেশ্যনৰ পুঁজিৰে গঠিত সংগঠনটোৰ সৈতে জড়িত বুলি বিজেপিয়ে অভিযোগ উত্থাপন কৰিছে৷
অৱশ্যে বিজেপিয়ে ভাৰতক অস্থিৰ কৰাৰ প্ৰচেষ্টাক সমৰ্থন কৰাৰ অভিযোগ আমেৰিকাই নাকচ কৰিছে৷ ইয়াৰ বিপৰীতে লোকসভাত এই বিষয়ত বিৰোধী নেতা ৰাহুল গান্ধীক ১০টা প্ৰশ্ন কৰাৰ কথা সদৰি কৰিছে বিজেপিৰ সাংসদ নিশিকান্ত ডুবেই৷ লগতে বিজেপিৰ সাংসদগৰাকীয়ে কয় যে মিডিয়া পৰ্টেল, সংগঠিত অপৰাধ আৰু দুৰ্নীতি প্ৰতিবেদন প্ৰকল্প (অ’চিচিআৰপি) আৰু ছ’ৰ’ছে বিৰোধীৰ সৈতে মিলি ভাৰতৰ অৰ্থনীতি ধ্বংস কৰাৰ লগতে মোডী চৰকাৰক বদনাম কৰাৰ ষড়যন্ত্ৰ কৰিছে বুলি অভিযোগ আনিছে।
বিজেপিয়ে অভিযোগ অনুসৰি ৰাহুল গান্ধীয়ে আদানীক লৈ অনুষ্ঠিত সংবাদমেল জৰ্জ ছ’ৰ’ছৰ পুঁজিৰে অ’চিচিআৰপিয়ে লাইভ টেলিকাষ্ট কৰিছিল। ইয়াৰ দ্বাৰা তেওঁলোকৰ মাজত শক্তিশালী আৰু বিপজ্জনক সম্পৰ্ক প্ৰকাশ পাইছে আৰু ভাৰতীয় অৰ্থনীতিক নিম্নগামী কৰাৰ প্ৰচেষ্টাক স্পষ্ট কৰি তুলিছে।
কংগ্ৰেছৰ সাংসদ শশী থাৰুৰে ৰাজহুৱাভাৱে জৰ্জ ছ’ৰ’ছক ‘পুৰণি বন্ধু’ বুলি অভিহিত কৰিছে বুলিও উল্লেখ কৰিছে৷ ইয়াৰোপৰি আমেৰিকাৰ সহযোগত অ'চিচিআৰপি আৰু ৰাহুল গান্ধীৰ সৈতে ষড়যন্ত্ৰ কৰি ভাৰতৰ ভাবমূৰ্তি ক্ষতিগ্ৰস্ত কৰিছিল বুলি বিজেপিয়ে ৫ ডিচেম্বৰত দাবী কৰিছিল।
ইফালে কংগ্ৰেছে মোডী চৰকাৰে আদানীক বচাবলৈ চেষ্টা কৰাৰ অভিযোগ উত্থাপন কৰিছে আৰু এই বিষয়টোৰ সম্পূৰ্ণ তদন্তৰ বাবে যৌথ সংসদীয় সমিতি গঠনৰ দাবী জনাইছে। এই বিষয়টো কংগ্ৰেছে সদনতো উত্থাপন কৰিছে৷
Continue Reading
