ডিজিটেল ডেস্কঃ কংগ্ৰেছৰ প্ৰাক্তন সভাপতি ৰাহুল গান্ধীৰ 'ভাৰত জোড়ো যাত্ৰা'ক লৈ প্ৰতিক্ৰিয়া ব্যক্ত কৰিছে ৰাম মন্দিৰৰ মুখ্য পুৰোহিতে। ৰাহুলৰ কাৰ্যসূচীয়ে মঙলবাৰে উত্তৰ প্ৰদেশত ভৰি ৰাখিব। ইয়াৰ পূৰ্বে ৰাম জন্মভূমি মন্দিৰৰ মুখ্য পুৰোহিত আচাৰ্য সতীন্দ্ৰ দাসে ছোনিয়াৰ পুত্ৰলৈ এখন পত্ৰ লিখে।
ৰাহুলক দিয়া এক অভিনন্দন বাৰ্তাত তেওঁ লিখে, "ভগৱান ৰামৰ আশীৰ্বাদ ৰাহুলৰ সৈতে থাকিব।" ৰাম মন্দিৰৰ পুৰোহিতজনে ভাৰত জোড়ো যাত্ৰা কাৰ্যসূচীৰ জৰিয়তে সমগ্ৰ দেশক একত্ৰিত কৰাৰ ৰাহুল গান্ধীৰ প্ৰচেষ্টাক প্ৰশংসা কৰে।
তেওঁ পত্ৰখনত লিখে, "আপুনি যি লক্ষ্যৰে এই কাৰ্যসূচী কৰি আছে, মই প্ৰাৰ্থনা কৰিছো আৰু আশা কৰোঁ যে ই সফল হ'ব।"
‘‘মই আপোনাক দীঘলীয়া জীৱনৰ শুভেচ্ছা জনাইছো।''- ৰাহুলক উদ্দেশ্যি আচাৰ্যই লিখে- "আপুনি সাধুজনৰ উদ্যোগ লৈছে। যিটো সকলোৰে বাবে ভাল। ভগৱান ৰামৰ আশীৰ্বাদ সদায় আপোনাৰ সৈতে থাকিব।’’
উল্লেখ্য যে আচাৰ্যই ৰাহুল গান্ধীৰ 'ভাৰত জোড়ো যাত্ৰা'ত যোগদান কৰাৰো ইচ্ছা প্ৰকাশ কৰিছিল। কিন্তু শাৰীৰিক কাৰণত তেওঁ যোগদান কৰিব নোৱাৰে৷ ৰাম মন্দিৰৰ প্ৰধান পুৰোহিতজনে ইতিমধ্যে ৰাহুলৰ কাৰ্যসূচীত নৈতিক সমৰ্থন ব্যক্ত কৰিছে।
Continue Reading
