ডিজিটেল ডেস্ক: নিৰ্বাচনী প্ৰচাৰ চলাবলৈ আজি মেঘালয়ত উপস্থিত হ’ল কংগ্ৰেছৰ যুৱৰাজ ৰাহুল গান্ধী৷ বিশাল নিৰ্বাচনী প্ৰচাৰ সভাত অংশ লৈ বিজেপিৰ লগতে তৃণমূল কংগ্ৰেছকো আক্ৰমণৰ লক্ষ্য কৰি ল’লে গান্ধীয়ে৷
ৰাহুল গান্ধীয়ে তৃণমূল কংগ্ৰেছৰ ৰাজনৈতিক অভিসন্ধি উদঙাই মমতা বেনাৰ্জীক আক্ৰমণৰ লক্ষ্য কৰি লয়৷ তেওঁ কয়, বিজেপিক জয়ী হোৱাত সহায় কৰিবলৈকে মেঘালয় নিৰ্বাচনত প্ৰতিদ্বন্দ্বিতা কৰিছে তৃণমূল কংগ্ৰেছে৷
বহুচৰ্চিত ভাৰত জোড়ো যাত্ৰা সমাপ্ত কৰাৰ পাছত কংগ্ৰেছ নেতা ৰাহুল গান্ধীয়ে এতিয়া আগন্তুক বিধানসভা নিৰ্বাচনত তেওঁৰ দলক গতি প্ৰদান কৰাত সহায় কৰিছে। নিৰ্বাচনমুখী মেঘালয়ত কংগ্ৰেছৰ হৈ প্ৰচাৰ চলাওঁতে দলটোৰ প্ৰাক্তন সভাপতিগৰাকীয়ে তৃণমূল কংগ্ৰেছক তীব্ৰ আক্ৰমণ চলাই অভিযোগ কৰে যে দলটোৱে উত্তৰ-পূবৰ ৰাজ্যখনত বিজেপি শাসনলৈ অহাটো নিশ্চিত কৰিবলৈ মেঘালয়ত নিৰ্বাচনত যুঁজ দিছে।
ৱায়ানাডৰ সাংসদজনে এইটোও লগতে কৈছিল যে গোৱা বিধানসভা নিৰ্বাচনৰ সময়তো তৃণমূলে একেই কাম কৰিছিল আৰু তেওঁলোকৰ অভীপ্সা আছিল বিজেপিক সহায় কৰা।
শ্বিলঙত নিৰ্বাচনী প্ৰচাৰসভাত ভাষণ দি তেওঁ কয়, আপোনালোকে তৃণমূলৰ ইতিহাস জানে৷ আপোনালোক তেওঁলোকৰ ৰাজনীতিৰ বিষয়ে অৱগত। তেওঁলোকে গোৱা নিৰ্বাচনত বৃহৎ পৰিমাণৰ ধন ব্যয় কৰিছিল আৰু উদ্দেশ্য আছিল বিজেপিক সহায় কৰা। মেঘালয়তো ঠিক এইটোৱেই উদ্দেশ্য৷ মেঘালয়ত টিএমচিৰ উদ্দেশ্যটো হৈছে বিজেপিক শক্তিশালী কৰা আৰু ক্ষমতালৈ অহাটো নিশ্চিত কৰা৷
আনহাতে, বিজেপিক শ্ৰেণী উৎপীড়ক আখ্যা দি বিজেপিকো আক্ৰমণৰ লক্ষ্য কৰি লয় ৰাহুল গান্ধীয়ে৷ বিজেপিক সমালোচনা কৰি ৰাহুল গান্ধীয়ে কয় যে গেৰুৱা দলটো শ্ৰেণী উৎপীড়কৰ দৰে, যি কাকো সন্মান নকৰে কিয়নো দলটোৱে ভাবে যে তেওঁলোকেই সকলো জানে। আন কাৰো প্ৰতি তেওঁলোকৰ কোনো সন্মান নাই। আমি তেওঁলোকৰ সৈতে সামূহিকভাৱে যুঁজ দিব লাগিব৷
ৰাহুল গান্ধীয়ে কৈছিল যে কংগ্ৰেছে বিজেপিক মেঘালয়ৰ ভাষা, সংস্কৃতি আৰু ইতিহাসৰ ক্ষতি কৰিবলৈ নিদিয়ে।
ৰাহুল গান্ধীয়ে প্ৰধানমন্ত্ৰীক প্ৰশ্ন কৰি কয়, মই প্ৰধানমন্ত্ৰীক গৌতম আদানিৰ সৈতে তেওঁৰ সম্পৰ্কৰ বিষয়ে সুধিছিলো। মই এখন ছবিও দেখুৱাইছিলো য'ত গৌতম আদানি আৰু নৰেন্দ্ৰ মোদী এখন বিমানত একেলগে বহি আছিল আৰু প্ৰধানমন্ত্ৰীয়ে আৰাম কৰি আছিল যেন সেয়া তেওঁৰ নিজৰ ঘৰহে৷
কংগ্ৰেছৰ প্ৰাক্তন মুৰব্বীগৰাকীয়ে এইটোও কৈছিল যে প্ৰধানমন্ত্ৰী মোদীয়ে সংসদত তেওঁৰ কোনো প্ৰশ্নৰ উত্তৰ দিয়া নাছিল।
বাজেট অধিৱেশনৰ সময়ত সংসদত তেওঁৰ ভাষণ প্ৰত্যাহাৰ কৰাৰ সন্দৰ্ভত ৰাহুল গান্ধীয়ে কয়, যেতিয়া মই সংসদত ভাষণ দিওঁ, তেতিয়া সেয়া ক’তো নাথাকে, যেতিয়া প্ৰধানমন্ত্ৰীয়ে ভাষণ দিয়ে তেতিয়া সেয়া সমগ্ৰ দূৰদৰ্শন চেনেলতে সম্প্ৰচাৰ কৰা হয়৷
কংগ্ৰেছৰ প্ৰাক্তন সভাপতিজনে লগতে কৈছিল যে বিজেপি আৰু আৰ এছ এছৰ কাৰণে তেওঁ ভাৰত জোড়ো যাত্ৰা কৰিবলৈ বাধ্য হৈছিল। তেওঁ এই সম্পৰ্কে কয়, আমি কন্যাকুমাৰীৰ পৰা কাশ্মীৰলৈ খোজ কাঢ়িছিলোঁ, যি প্ৰায় ৪,০০০ কিলোমিটাৰ যাত্ৰা আছিল। আমি এইটো কৰিবলৈ বাধ্য হৈছিলোঁ কাৰণ বিজেপি আৰু আৰ এছ এছে সংসদ, সংবাদ মাধ্যম, আমোলাতন্ত্ৰ, নিৰ্বাচন আয়োগ আৰু ন্যায়পালিকাকে ধৰি ভাৰতৰ প্ৰতিটো প্ৰতিষ্ঠান দখল কৰিছে।
মেঘালয়ত বিধানসভা নিৰ্বাচন ২৭ ফেব্ৰুৱাৰীত ৫৯ খন আসনত অনুষ্ঠিত হ'ব আৰু নগালেণ্ড আৰু ত্ৰিপুৰাৰ সৈতে ২ মাৰ্চত ভোটগণনা কৰা হ'ব।
Continue Reading
