ডিজিটেল ডেস্কঃ পত্নীৰ যোগ্য মযাৰ্দা পোৱাৰ দাবীত ধৰ্ণাত বহিল এগৰাকী বোৱাৰী। স্বামীৰ ঘৰৰ সন্মুখতে ধৰ্ণাত বহিল মহিলাগৰাকী। পশ্চিমবংগৰ মেদিনীপুৰৰ ডেববাৰ খানামোচন অঞ্চলৰ চকবাহাদুৰপুৰ গাঁৱত সংঘটিত হৈছে এই ঘটনা।
জানিব পৰা মতে খড়গপুৰ স্থানীয় আৰক্ষী থানাৰ বসন্তপুৰ গাঁৱৰ অংকিতা পাত্ৰই পশ্চিম মেদিনীপুৰৰ ডেবৰাৰ চাকবাহাদুৰপুৰ অঞ্চলৰ দেৱাশিষ মাইতিৰ সৈতে বিবাহপাশত আবদ্ধ হৈছিল। ডেৰ বছৰ পূৰ্বে এই বিবাহ সম্পন্ন হৈছিল। অংকিতা পাত্ৰৰ পিতৃগৃহই অভিযোগ কৰা অনুসৰি বিয়াৰ পিছৰে পৰা শহুৰেকৰ ঘৰৰ লোকে নানা ধৰণৰ মানসিক অত্যাচাৰ চলাইছিল অংকিতাক।
পৰিয়ালটোৰ সমস্যা সমাধানৰ বাবে বাৰে বাৰে চেষ্টা কৰিছিল অংকিতাই। দুখৰ বিষয় যে অংকিতাৰ সকলো চেষ্টা ব্যৰ্থ হৈছিল। পাৰিবাৰিক সমস্যাৰ কোনো সমাধান নোলোৱাত শহুৰেকৰ ঘৰৰ চোতালত ধৰ্ণাত বহি প্ৰাপ্য সন্মান দাবী কৰিলে মহিলাগৰাকীয়ে।
অংকিতাই কয়, ‘‘মই বুজি পোৱা নাই যে মোৰ স্বামীয়ে মোক কি কাৰণত গ্ৰহণ কৰিব বিচৰা নাই। মোক বহু ধৰণে মানসিক অত্যাচাৰ কৰা হৈছে। গতিকে দেউতাৰ ঘৰলৈ যাবলৈ বাধ্য হ’লো। দেউতাৰ ঘৰৰ পৰা ঘূৰি অহাৰ পাছত ঘৰত সোমাবলৈ দিয়া নহ’ল। মই এগৰাকী যোগ্য পত্নীৰ মৰ্যাদা লাভ কৰিব বিচাৰো।’’
অংকিতাৰ পিতৃ উত্তম পাত্ৰই কয়, আমি অংকিতাৰ শহুৰেকৰ লগত বহুবাৰ আলোচনা কৰিছো কিন্তু কোনো সমাধান নহ’ল। মোৰ ছোৱালীজনীয়ে বিয়াৰ প্ৰমাণপত্ৰ লৈ স্বামীৰ ঘৰলৈ আহি ধৰ্ণা কাৰ্যসূচী ৰূপায়ণ কৰিছে।অৱশ্যে এতিয়ালৈকে শহুৰেকৰ ঘৰৰ পৰা কোনো ধৰণৰ মন্তব্য লাভ কৰা হোৱা নাই।
Continue Reading
