‘বিক্ৰী হ’লে সলনি বা ঘূৰাই লোৱা নহ’ব!’ স্বামীক নিলামত দি চৰ্ত ৰাখিলে পত্নীয়ে!

ডিজিটেল ডেস্ক : নিলামত নিজ স্বামীক দি চৰ্চাত এহাল দম্পতী৷ সা-সামগ্ৰীৰ দৰে স্বামীক নিলাম কৰাৰ বিজ্ঞাপন দি এগৰাকী মহিলাই সকলোকে একপ্ৰকাৰ স্তম্ভিত কৰি তুলিছে। ছ’চিয়েল মিডিয়াত এই বিষয়টোৱে লাভ কৰিছে ব্যাপক চৰ্চা। মহিলাগৰাকীয়ে তেওঁৰ স্বামীৰ গাৰ বৰণ, উচ্চতা, বৃত্তি, বয়সকে ধৰি সকলো প্ৰয়োজনীয় তথ্য ৱেবছাইটত আপলোড কৰিছে। মহিলাগৰাকীয়ে এই বিজ্ঞাপন প্ৰকাশ কৰাৰ লগতে তুলিছে চৰ্তও৷ মহিলাগৰাকীয়ে লিখে, ‘বিক্ৰী চূড়ান্ত যদিও পাছত কোনো সলনি বা ঘূৰাই লোৱা নহ’ব।’ অৱশ্যে এই ঘটনাৰ আঁৰত আছে অতি মনোৰঞ্জক এটি কাহিনী। আয়াৰলেণ্ডৰ বাসিন্দা এই মহিলাগৰাকীৰ নাম হৈছে লিণ্ডা মেকঅ্যালিষ্টাৰ। মহিলাগৰাকীৰ অভিযোগ অনুসৰি তেওঁৰ স্বামী মেকঅ্যালিষ্টাৰে তেওঁৰ দুই সন্তান আৰু পত্নীক ঘৰত ৰাখি গৰমৰ ছুটীত অকলেই ফুৰিবলৈ গৈ আনন্দেৰে সময় কটাইছিল। উল্লেখ্য যে মহিলাগৰাকীয়ে নিলামৰ বিজ্ঞাপন দিয়াৰ পাছত ১২জন গ্ৰাহকো লাভ কৰাৰ লগতে কিছুসময়ৰ ভিতৰতে কেইবাহাজাৰ টকা দামো উঠা বুলি জানিব পৰা গৈছে। এনে বিজ্ঞাপন সম্পৰ্কত ৱেবছাইটৰ তৰফৰ পৰা কয় যে, ‘কোনো মহিলাই নিজৰ স্বামীক নিলামত দিয়াৰ এনে বিজ্ঞাপন এয়ে প্ৰথম দেখা গৈছে।’