পত্নীৰ মোবাইল ফোন ব্যৱহাৰ কৰাই হ’ল অপৰাধ! কাঁটা চামুচেৰে কাটিলে স্বামীৰ ওঁঠ

ডিজিটেল ডেস্কঃ এটা মোবাইল ফোনৰ বাবেই পত্নীয়ে কাঁটা চামুচেৰে আক্ৰমণ কৰিলে স্বামীক। পত্নীয়ে মোবাইল ফোনৰ বাবে কাঁটাচামুচেৰে খুঁচি খুঁচি স্বামীৰ ওঁঠ কাটি পেলায়। শুনিবলৈ আচৰিত যেন লাগিলেও আমাৰ দেশতে সংঘটিত হৈছে এই ঘটনা। মহাৰাষ্ট্ৰৰ ভান্দাৰৰ মাচালৰ খেমৰাজ বাবুৰাও মূল নামৰ ৪০ বছৰীয়া লোকজনে নিজৰ মোবাইল ফোনটো পৰি ভঙাত পত্নীৰ মোবাইল ফোনটো ব্যৱহাৰ কৰিবলৈ লয়।

পত্নীয়ে স্বামী বাবুৰাওক কয় যে মাত্ৰ দুদিনৰ বাবেহে তেওঁৰ মোবাইল ফোনটো ব্যৱহাৰ কৰিবলৈ দিব। কিন্তু দুদিন পাৰ হোৱাৰ পিছতো পত্নীক মোবাইল ফোনটো ওভতাই নিদিলে স্বামীয়ে। ইয়াকে লৈ দুয়োৰে মাজত কাজিয়া হয়। কাজিয়াই ইমানেই চূড়ান্ত ৰূপ লয় যে পত্নীয়ে হাতত কাঁটা চামুচ এখন লৈ স্বামী বাবুৰাওৰ ওঁঠত কেইবাবাৰো আঘাত কৰে। ফলত বাবুৰাওৰ ওঁঠটো কটা যায় আৰু ধাৰষাৰ তেজ ব’বলৈ ধৰে।

আহত খেমৰাজ বাবুৰাও লৰালৰিকৈ লখনদুৰৰ এখন গ্ৰামীণ চিকিৎসালয়লৈ যায় আৰু চিকিৎসা কৰায় নিজক। কটা ওঁঠ জোৰা লগাই প্ৰথমেই বাবুৰাও যায় লখনদুৰ আৰক্ষী থানালৈ। আৰক্ষী থানাত তেওঁ পত্নীৰ বিৰুদ্ধে গোচৰ দিয়ে। বাবুৰাওৰ এজাহাৰৰ ভিত্তিত আৰক্ষীয়ে আক্ৰমণকাৰী পত্নীৰ বিৰুদ্ধে ধাৰা ৩২৪ আৰু ৫০৪ ৰ অধীনত গোচৰ ৰুজু কৰে।