বিশ্ব স্বাস্থ্য সংস্থাৰ সতৰ্কবাণী: বিশ্বত উল্লেখযোগ্য ঘাতকৰ ৰূপত নিমখ! বছৰি ১.৮৯ নিযুত লোকৰ মৃত্যু হয় নিমখৰ বাবেই

বিশ্ব স্বাস্থ্য সংস্থাই প্ৰকাশ কৰা মতে  অত্যধিক নিমখ খোৱাৰ ফলত প্ৰতি বছৰে প্ৰায় ১.৮৯  নিযুত লোকৰ মৃত্যু হয়। নিমখে  উচ্চ ৰক্তচাপ আৰু হৃদযন্ত্ৰৰ  সমস্যাৰ সৃষ্টি কৰে। গতিকে, কিমান নিমখ দেহৰ বাবে অপকাৰী?   এয়া এক  ডাঙৰ প্ৰশ্ন। নিমখত থকা  ছডিয়াম হৈছে এক অত্যাৱশ্যকীয় উপাদান,  যি উপাদানে আমাৰ দেহৰ কোষবোৰৰ স্বাভাৱিক কাৰ্যকলাপ বজাই ৰখাত সহায় কৰে। ছডিয়াম প্ৰাকৃতিকভাৱে বিভিন্ন খাদ্যত, যেনে গাখীৰ, মাংস, আৰু শেলফিছত পোৱা যায়। কিন্তু যদি অতিৰিক্ত পৰিমাণত গ্ৰহণ কৰা হয় তেন্তে ছডিয়ামে হৃদৰোগ, ষ্ট্ৰোক আৰু অকাল মৃত্যুৰ আশংকা বৃদ্ধি কৰে বুলি  বিশ্ব স্বাস্থ্য সংস্থাৰ এক প্ৰতিবেদনত কোৱা হৈছে। হাৰ্ভাৰ্ড মেডিকেল স্কুলৰ এক প্ৰতিবেদনত এইবুলিও কোৱা হৈছে যে অত্যধিক ছডিয়াম গ্ৰহণৰ ফলত উচ্চ ৰক্তচাপ হয়, যাৰ ফলত হৃদযন্ত্ৰ বিকল হোৱাৰ আশংকা অধিক বৃদ্ধি পায়। 

ই  হৃদযন্ত্ৰৰ ৰোগ  থকা লোকসকলৰ ক্ষেত্ৰতো জটিলতাৰ সৃষ্টি কৰে। নিমখৰ বাবে অনুমোদিত পৰিমাণ  কি: প্ৰাপ্তবয়স্কসকলৰ বাবে, বিশ্ব স্বাস্থ্য সংস্থাই ২০০০ মিগ্ৰা/দিনত  ছডিয়াম গ্ৰহণৰ পৰামৰ্শ দিয়ে, যি মাত্ৰ এক চাহ চামুচতকৈ কিছু কম।  অৱশ্যে, শিশুৰ বাবে এই পৰিমাণ তেওঁলোকৰ শক্তিৰ প্ৰয়োজনীয়তা অনুসৰি মিলাব লাগিব। বিশ্ব স্বাস্থ্য সংস্থাই লগতে পৰামৰ্শ দিছে যে খোৱা নিমখ আয়ডিনযুক্ত  হ’ব লাগে। আয়ডিন মগজুৰ বিকাশৰ বাবেও অত্যাৱশ্যকীয় উপাদান। ছডিয়াম গ্ৰহণ হ্ৰাস কৰিবলৈ কেতবোৰ  পৰামৰ্শও দিছে বিশ্ব স্বাস্থ্য সংস্থাই: আমি হঠাতে নিমখ খোৱা একেবাৰে এৰি দিয়াটো অসম্ভৱ আৰু তেনে কৰিব নালাগেও। নিমখ বিহীন আহাৰৰ সোৱাদ পোৱা নাযায়। সেয়েহে বিশ্ব স্বাস্থ্য সংস্থাই খাদ্যত যিমান পাৰি সিমান কমকৈ নিমখ খোৱাৰ  পৰামৰ্শ দিছে। লগতে, কেঁচা নিমখ খোৱা পৰিহাৰ কৰিবলৈ কৈছে। উল্লেখ্য চেনি আৰু নিমখ পৰাপক্ষত কমকৈ খাবলৈ স্বাস্থ্য বিজ্ঞানীসকলে পৰামৰ্শ দি আহিছে৷ চেনিৰ লগতে অত্যধিক নিমখে দেশৰ নানান ক্ষতি সাধন কৰিব পাৰে৷