বলীউডত উঠিছে বিয়াৰ ধুম! এইবাৰ ফাৰহান আখটাৰৰ বিয়া..কইনা কোন?

ডিজিটেল ডেস্কঃ বলীউডত চলি আছে বিয়াৰ গৰম বতৰ। বহুতো চেলিব্ৰিটিয়ে তেওঁলোকৰ সংগীৰ সৈতে বিবাহপাশত আৱদ্ধ হৈছে। এইবাৰ ফাৰহান আখটাৰৰ বিয়াৰ খবৰ ওলাইছে। ২১ ফেব্ৰুৱাৰীত মাহ-হালধি সানিবলৈ সাজু হৈছে ফাৰহান। প্ৰসিদ্ধ গীতিকাৰ পিতৃ জাভেদ আখটাৰে নিশ্চিত কৰিছে এই বিয়াৰ খবৰ। পিছে ফাৰহানৰ কইনা কোন? ৪১ বছৰীয়া শিৱানী দাণ্ডেকাৰৰ সৈতে চিৰজীৱনলৈ এক হ'বলৈ গৈ আছে ৪৮ বছৰীয়া ফাৰহান আখটাৰ। পিতৃ জাভেদ আখটাৰে কোৱা অনুসৰি ফাৰহানে তেওঁৰ প্ৰেমিকা শিৱানীক ২১ ফেব্ৰুৱাৰীত বিয়া কৰাব, এই বিয়াখন জাভেদ আখটাৰৰ খাণ্ডালাৰ ঘৰত অনুষ্ঠিত হ'ব। বিয়াখন অতি সাধাৰণভাৱে পতা হ'ব, য'ত ক'ৰনা মহামাৰীৰ বাবে জাৰি কৰা সীমাবদ্ধতাৰ বাবে কেৱল কেইজনমান নিৰ্বাচিত লোকেহে অংশগ্ৰহণ কৰিব। তেওঁ লগতে কয় যে ''এতিয়ালৈকে কাকো বিয়াৰ কাৰ্ড প্ৰেৰণ কৰা হোৱা নাই। বিবাহৰ সকলো প্ৰস্তুতি ৱেডিং প্লেনাৰ্ছসকলৰ দ্বাৰা পৰিচালনা কৰা হৈছে। সাম্প্ৰতিক পৰিস্থিতিৰ বাবে আমি বৃহৎ পৰিমাণত একো কৰিব নোৱাৰো। গতিকে আমি কেৱল কেইজনমান লোকক মাতিম। এইখন অতি সাধাৰণ বিবাহ হ'ব।'' কইনা শিৱানীৰ সন্দৰ্ভত জাভেদ আখটাৰে কয়, ''শিৱানী এজনী অতি ভাল ছোৱালী। আমাৰ পৰিয়ালৰ সকলোৱে শিৱানীক বৰ পচন্দ কৰে। সকলোতকৈ ভাল লগা কথাটো হ'ল ফাৰহান আৰু শিৱানীৰ সম্পৰ্কটো বৰ মধুৰ। এয়া অতি ভাল লগা কথা।'' উল্লেখ্য যে ২০১৮ চনৰ পৰা শিৱানী দাণ্ডেকাৰৰ সৈতে প্ৰেমৰ সম্পৰ্কত আছে ফাৰহান। ফাৰহানৰ এইখন দ্বিতীয় বিবাহ। ২০০০ চনত নিজতকৈ ৭ বছৰৰ ডাঙৰ আধুনা ভৱানীৰ সৈতে বিবাহপাশত আৱদ্ধ হৈছিল ফাৰহান। ২০১৭ চনত আধুনাৰ সৈতে বিবাহ বিচ্ছেদ ঘটে ফাৰহানৰ। তেওঁলোকৰ চান্যা আৰু আকিৰা নামৰ দুগৰাকী কন্যা সন্তান আছে। ফাৰহান-শিৱানীক দৰা-কইনা ৰূপত চাবলৈ এতিয়া অধীৰ আগ্ৰহেৰে বাট চাইছে অনুৰাগীসকলে। আৰু পঢ়কঃ কাইলৈ সৰস্বতী পূজা; ভুলতো নকৰিব এই কাম, নহ’লে মা সৰস্বতী হ’ব ৰুষ্ট