ডিজিটেল ডেস্কঃ বৈবাহিক ধৰ্ষণৰ ওপৰত অহা ৯ মে’ত শুনানি গ্ৰহণ কৰিব উচ্চতম ন্যায়ালয়ে। ইয়াক এক অপৰাধমূলক কাৰ্য হিচাপে বিবেচনা কৰিব পাৰি নে নোৱাৰি, এই সন্দৰ্ভত সিদ্ধান্ত লোৱা হ’ব। উচ্চতম ন্যায়ালয়ত বৈবাহিক ধৰ্ষণক অপৰাধ হিচাপে ঘোষণা কৰিবলৈ ইতিমধ্যে আহ্বান জনাই আবেদন দাখিল কৰা হৈছে। আবেদনৰ শুনানি গ্ৰহণ কৰি আজি শীৰ্ষ ন্যায়ালয়ে এই সন্দৰ্ভত বিতং শুনানিৰ বাবে ৯ মে’ৰ সময় নিৰ্ধাৰণ কৰিছে।
জ্যেষ্ঠ অধিবক্তা ইন্দিৰা জয়সিঙে মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত এখন বিচাৰপীঠৰ সন্মুখত এই বিষয়টো উত্থাপন কৰিছিল। আনহাতে কেন্দ্ৰীয় চৰকাৰক প্ৰতিনিধিত্ব কৰা ছলিচিটৰ জেনেৰেল তুষাৰ মেহতাই এই সন্দৰ্ভত কেন্দ্ৰৰ উত্তৰ সাজু আৰু বিষয়টোৰ পৰীক্ষা কৰিব লাগিব বুলি আদালতত উল্লেখ কৰে।
ইয়াৰ পিছতে শীৰ্ষ আদালতৰ বিচাৰপীঠে বিষয়টো ৯ মে’ত শুনানিৰ বাবে তালিকাভুক্ত কৰে। উল্লেখ্য যে, বিগত ১৬ জানুৱাৰীত উচ্চতম ন্যায়ালয়ে বৈবাহিক ধৰ্ষণক অপৰাধমূলক কাৰ্য হিচাপে গণ্য কৰিবলৈ আহ্বান জনাই দাখিল কৰা কিছু আবেদনৰ ওপৰত কেন্দ্ৰীয় চৰকাৰৰ পৰা সঁহাৰি বিচাৰিছিল।
লক্ষণীয়ভাৱে যোৱা বৰ্ষৰ মে’ মাহত দিল্লী উচ্চ ন্যায়ালয়ে বৈবাহিক ধৰ্ষণক অপৰাধমূলক কাৰ্য হিচাপে বুলি গণ্য কৰিবলৈ আহ্বান জনোৱা এনে আবেদনৰ শুনানি গ্ৰহণ কৰি পৃথক পৃথক মতামত প্ৰকাশ কৰিছিল। ইয়াৰ পাছতে উচ্চতম ন্যায়ালয়ত দাখিল কৰা হৈছিল আবেদন।
Continue Reading
