ডিজিটেল ডেস্কঃভাৰতৰ চিৰ বৈৰী ৰাষ্ট্ৰ চীনে ভাৰতৰ বিৰুদ্ধে অহৰহ ভাবে ষড়যন্ত্ৰ ৰচনা কৰি গৈছে৷ সীমান্তৰ লাডাখ এলেকাত চীনৰ সেনাই ভাৰতৰ বিশাল ভূ খণ্ড দখল কৰি আছে৷ ভাৰতৰ সৈতে লাডাখ বিবাদ সন্দৰ্ভত চীনৰ ১৬ লানি আলোচনা হৈছে যদিও চীনে লাডাখৰ পৰা সেনা আঁতৰাই নিয়া নাই৷ ইয়াৰ বিপৰীতে চীনে লাডাখ এলেকাত ৫ জি নেটৱৰ্কহে সৃষ্টি কৰিছে৷ লাডাখত চীনৰ সেনাই এনে অতি দ্ৰুত মোবাইল ফোনৰ সেৱা মুকলি কৰাৰ সময়তে ভাৰতীয় সেনায়ো দুৰ্গম পাহাৰীয়া এলেকাত ৪ জি আৰু ৫ জি নেটৱৰ্ক সৃষ্টিৰ পোষকতা কৰিছে৷ সেইমৰ্মে ভাৰতীয় সেনাৰ তৰফৰ পৰা নিবিদাও আহ্বান কৰা হৈছে৷
চীনৰ সৈতে তাল মিলাই ভাৰতীয় সেনাই দূৰৱৰ্তী উচ্চ উচ্চতাৰ অঞ্চলত ইয়াৰ যোগাযোগ আন্তঃগাঁথনি বৃদ্ধি কৰি থকাৰ কথা সেনাৰ সূত্ৰই প্ৰকাশ কৰিছে৷ সমুদ্ৰপৃষ্ঠৰ পৰা ১৮,০০০ ফুট উচ্চতাতো যাতে দ্ৰুত মোবাইল ফোনৰ সেৱা লাভ কৰিব পৰা যায় তাৰ বাবে বিশাল বিশাল টাৱাৰ স্থাপন কৰা হ’ব৷ চীনে কেইবাটাও ঠাইত প্ৰকৃত নিয়ন্ত্ৰণ ৰেখাৰ (এলএচি) ওচৰত ৫জি নেটৱৰ্কস্থাপন কৰাৰ পিছতে ভাৰতেও তেনে কৰিবলৈ ওলাইছে৷।
উল্লেখ্য ২০২০ চনত লাডাখত চীনৰ সামৰিক বাহিনীয়ে ভাৰতৰ বহু ঠাই দখল কৰিছিল৷ ইয়াৰ পিছতে চীনে লাডাখত নিজৰ দেশৰ সেনাৰ বাবে ৫ জি নেটৱৰ্কৰ ব্যৱস্থা কৰে৷ ভাৰতীয় সেনায়ো ৪ জি আৰু ৫জি মোবাইল চেলুলাৰ নেটৱৰ্কৰ বাবে প্ৰযুক্তি প্ৰদান কৰিবলৈ কোম্পানীবোৰৰ পৰা নিবিদা বিচাৰিছে৷
চীনৰ তুলনাত সীমান্তত ভাৰতৰ মোবাইল ফোনৰ নেটৱৰ্ক দুৰ্বল বুলি আলোচনা হৈ আহিছে৷ এনে সময়তে ভাৰতীয় সেনাই সুউচ্চ সীমান্তত উন্নত মোবাইল ফোনৰ সেৱা আৰম্ভ কৰিবলৈ বিচৰা কথাই সীমান্তত কৰ্মৰত সেনাক সহায় কৰিব বুলি ধাৰণা কৰা হৈছে৷
Continue Reading
