ডিজিটেল ডেস্কঃ 'তাৰক মেহতা কা উলতা চশমা' ছিৰিয়েলৰ জেঠালাল চৰিত্ৰৰে জনপ্ৰিয় হৈ পৰা অভিনেতা দিলীপ যোশীয়ে আজি ৫৫ সংখ্যক জন্মদিন পালন কৰিছে। দিলীপ যোশীয়ে ছলমান খানৰ সৈতে তেওঁৰ প্ৰথমখন ছবিত কাম কৰিছিল যদিও তেওঁ মাচুল হিচাপে মাত্ৰ ৫০ টকাহে পাইছিল।
১৯৮৯ চনত ছলমান খান আৰু ভাগ্যশ্ৰীৰ ‘মেইনে প্যাৰ কিয়া’ ছবিৰে বলীউডত অভিষেক ঘটোৱা দিলীপ যোশীয়ে ছবিখনত ৰামুৰ চৰিত্ৰত অভিনয় কৰিছিল, যাৰ বাবে তেওঁক ৫০ টকা মাচুল দিয়া হৈছিল।
আজি তেওঁ কোটি কোটি মূল্যৰ সম্পত্তিৰ মালিক। কেৰিয়াৰত বহু সংগ্ৰাম কৰা অভিনেতাগৰাকীয়ে আজি এনে এটা পৰ্যায় পাইছেগৈ যে এটা খণ্ডৰ শ্বুটিঙৰ বাবে প্ৰায় ডেৰ লাখ টকা লয়। তেওঁ হৈছে 'তাৰক মেহতা কা উলতা চশমা'ৰ সৰ্বাধিক দৰমহা পোৱা অভিনেতা।
দিলীপ যোশীৰ কেৰিয়াৰ লাহে লাহে আগবাঢ়িছিল। মেইন প্যাৰ কিয়াৰ পিছত হামৰাজ, দিল ভি হে হিন্দুস্তানী, খিলাড়ী ৪২০ আদি ছবিত সৰু সৰু চৰিত্ৰত অভিনয় কৰিছিল অভিনেতাগৰাকীয়ে। অভিনেতাগৰাকীয়ে টিভিতো কাম কৰিছিল যদিও বিশেষ একো নহ’ল। তাৰপাছত ২০০৬ বৰ্ষৰ পাছত বহুদিন অভিনেতাজনে কোনো কাম কৰা নাছিল।
দিলীপ যোশীয়ে তেওঁৰ বহু সাক্ষাৎকাৰত কৈছে যে ২০০৮ চনত যেতিয়া তেওঁ 'তাৰক মেহতা কা উলতা চশমা'ৰ অফাৰ পাইছিল, তেতিয়া তেওঁ জেঠালাল আৰু বাপুজীৰ চৰিত্ৰৰ মাজৰ পৰা এটা বাছনি কৰাৰ সুযোগ পাইছিল। তেওঁ জেঠালালক বাছি লৈছিল আৰু আজি তেওঁ টিভি উদ্যোগৰ সেই তাৰকা। যাৰ সফলতাৰ চৰ্চা সকলোতে হয়।
Continue Reading
