ডিজিটেল ডেস্কঃ মাতৃ শ্বেতা তিৱাৰী টেলিভিছনৰ চিনাকি মুখ। কিন্তু কন্যা পলক তিৱাৰীয়ে বলীউডত প্ৰৱেশ কৰিবলৈ ওলাইছে। ছলমান খানৰ ‘কিছি কা ভাই কিছি জান’ ছবিৰে বলীউডত অভিষেক ঘটাবলৈ গৈ আছে পলকে। এই ছবিখন অহা ঈদত মুক্তি পাব। ছবিখনত কাম কৰাৰ অভিজ্ঞতা সকলোৰে সৈতে ভাগ-বতৰা কৰাৰ সময়তে পলকে বলীউডৰ ভাইজানৰ এটা বিশেষ নিয়মৰ কথা ক’লে।
বলীউডত ভৰি দিয়াৰ পূৰ্বে পলক তিৱাৰীক দেখা গৈছিল ‘বিজলী বিজলী’ মিউজিক ভিডিঅ’ত। অতি কম সময়ৰ ভিতৰতে পৰ্দাত মনোমোহা উপস্থিতিৰ বাবেই ‘বিজলী গাৰ্ল’ উপাধি লাভ কৰে। অৱশ্যে ‘কিছি কা ভাই কিচি কি জান’ ছবিখনত তাই ‘ভাল ছোৱালী’ হ’ব লগা হৈছে।
পলকে কয় যে ছলমান খানে ছবিখনৰ চেটত মহিলাৰ সাজ-পোছাকৰ বাবে বিশেষ নিয়ম আৰোপ কৰিছিল। চেটত উপস্থিত থকা সকলো মহিলাকে বুকুত ঢাকি থোৱা কাপোৰ পিন্ধিবলৈ ভাইজানে নিৰ্দেশ দিছিল।
এই নিয়ম কেৱল ‘কিছি কা ভাই কিছি কি জান’ ছবিৰ বাবে প্ৰযোজ্য নহয়। পলকে কয় যে, ছলমানে ‘অণ্টিম: দ্য ফাইনেল ট্ৰুথ’ৰ চেটত একে নিয়ম ৰাখিছিল। এক সাক্ষাৎকাৰত নতুন অভিনেত্ৰীগৰাকীয়ে কয় যে ‘কিছি কা ভাই কিছি কি জান’ ছবিত অভিনয়ৰ অভিষেক ঘটাৰ পূৰ্বে তেওঁ ‘অণ্টিম: দ্য ফাইনেল ট্ৰুথ’ত সহকাৰী পৰিচালক হিচাপে কাম কৰিছিল। মহেশ মঞ্জৰেকাৰৰ ছবিখনত ছলমানে একে নিয়ম পালন কৰিছিল।
পলকে কয়- ''এদিন মোক চাৰ্ট আৰু জগাৰ পিন্ধি ঘৰৰ পৰা ওলাই অহা দেখি মা আচৰিত হৈছিল। মোক সোধাত মই কৈছিলো যে মই ছলমান ছাৰৰ চেটলৈ যাম। মোক সেই পোছাক পিন্ধা দেখি মায়ে বৰ সুখী হৈছিল!''
অভিনেত্ৰীগৰাকীয়ে কয়- ''ছলমান অলপ পুৰণাপন্থী মানুহ! আমি যিকোনো ধৰণৰ কাপোৰ পিন্ধিলে তেওঁৰ আপত্তি নাই। কিন্তু তেওঁ বিচাৰে আমি সুৰক্ষিত হও, সাৱধান হও। বিশ্বাস নকৰালৈকে তেওঁ কাকো বিশ্বাস নকৰে।''
Continue Reading
