ডিজিটেল ডেস্ক: নাটকীয়ভাৱে বিৰোধী মিত্ৰজোঁট ‘ইণ্ডিয়া’ৰ পৰা আঁতৰিল ৰাষ্ট্ৰীয় লোক দল, চমুকৈ আৰএলডি৷ প্ৰাক্তন প্ৰধানমন্ত্ৰী চৰণ সিঙক ভাৰত ৰত্ন প্ৰদানৰ সিদ্ধান্ত প্ৰধানমন্ত্ৰী মোদীয়ে ঘোষণা কৰাৰ কেইঘণ্টামান পাছতেই উত্তৰ প্ৰদেশত বিজেপিৰে মিত্ৰতা নিশ্চিত কৰিলে প্ৰাক্তন প্ৰধানমন্ত্ৰীগৰাকীৰ নাতিয়েক তথা ৰাজ্যসভাৰ সাংসদ জয়ন্ত চৌধাৰীয়ে৷
আৰএলডিৰ মুৰব্বী জয়ন্ত চৌধুৰীয়ে শুকুৰবাৰে উত্তৰ প্ৰদেশত বিজেপিৰ সৈতে ২০২৪ চনৰ লোকসভা নিৰ্বাচনৰ বাবে মিত্ৰতা নিশ্চিত কৰে৷ প্ৰধানমন্ত্ৰী মোদীৰ প্ৰতি গভীৰ কৃতজ্ঞতা প্ৰকাশ কৰি জয়ন্ত চৌধাৰীয়ে কয়, মোদীজীৰ দৃষ্টিভংগীয়ে এতিয়ালৈকে আন কোনো দলে কৰিব নোৱৰা কামটো কৰিলে৷
তেওঁ কয়, আসন বা ভোটৰ কথা ক’লে এই দিনটো কম গুৰুত্বপূৰ্ণ হ'ব যেতিয়া মোক অভিনন্দন জনোৱা হ’ব আৰু প্ৰধানমন্ত্ৰী মোদীয়ে এটা সিদ্ধান্ত দিছে যিয়ে প্ৰমাণ কৰে যে তেওঁ ৰাষ্ট্ৰৰ মৌলিক অনুভূতি আৰু চৰিত্ৰ বুজি পায়।
বিজেপিৰে আসন ভাগ-বটোৱাৰা চুক্তি অনুসৰি, আৰএলডিয়ে দুখন লোকসভা আসন— বাঘপট আৰু বিজনৌৰত প্ৰতিদ্বন্দ্বিতা কৰিব আৰু ৰাজ্যসভাৰ আসনৰ প্ৰতিশ্ৰুতিও দিয়া হৈছে আৰএলডিক৷
জয়ন্ত চৌধাৰীৰ আৰএলডিৰ পশ্চিম উত্তৰ প্ৰদেশত প্ৰভাৱ আছে আৰু প্ৰভাৱশালী জাট সম্প্ৰদায়ৰ এই অঞ্চলত বিজেপিয়ে ৰাজনৈতিক লাভ উঠোৱাৰ আশা কৰিব।
দৰাচলতে, ২০১৯ৰ লোকসভা নিৰ্বাচনত উত্তৰ প্ৰদেশত বিজেপিয়ে পৰাজিত ১৬খন আসনৰ ভিতৰত ৭খন পশ্চিম উত্তৰ প্ৰদেশৰ আছিল। উল্লেখযোগ্য যে উত্তৰ প্ৰদেশত ইণ্ডিয়া ব্লকৰ অংশীদাৰসকলৰ মাজত আসন ভাগ-বটোৱাৰাক লৈ মতভেদ চলি থকাৰ মাজতে আজি জয়ন্ত চৌধাৰীৰ স্থিতিয়ে আউল লগালে বিৰোধীৰ সমীকৰণত৷
Continue Reading
