চণ্ডীগড়ত ‘আপ’ৰ বিজয়ধ্বজা: পৌৰসভাৰ নিৰ্বাচনতে প্ৰত্যাহ্বানৰ সন্মুখীন বিজেপি, কংগ্ৰেছৰ

ডিজিটেল ডেস্ক: পঞ্জাবত উৰিছে আম আদমী পাৰ্টীৰ বিজয়ধ্বজা! দেশৰ ৰাজনীতিৰ ক্ষেত্ৰখনত লাহে লাহে গভীৰভাৱে শিপাবলৈ আৰম্ভ কৰিছে দিল্লীৰ মুখ্যমন্ত্ৰী অৰবিন্দ কেজৰিৱালৰ নেতৃত্বাধীন দল আম আদমী পাৰ্টী চমুকৈ আপে৷ পঞ্জাবৰ বিধানসভা নিৰ্বাচন এমাহৰ পাছতে৷এই সময়ছোৱাত দেশৰ ৰাজনৈতিক দলসমূহে নামি পৰিছে নিৰ্বাচনকেন্দ্ৰিক প্ৰতিযোগিতাত৷ অলপতে হৈ যোৱা চণ্ডীগড় পৌৰসভা নিৰ্বাচন ২০২১ত আপে লাভ কৰে বৃহৎ সাফল্য৷ বিধানসভা নিৰ্বাচনৰ আগমুহূৰ্তত আপৰ এই সাফল্যই বাৰুকৈয়ে প্ৰভাৱ পেলাব ৰাজ্যখনৰ আগন্তুক নিৰ্বাচনত৷

সোমবাৰে ঘোষণা হোৱা পৌৰসভাৰ নিৰ্বাচনত মুঠ ৩৫খন আসনৰ ভিতৰত আপে লাভ কৰে ১৪খন আসন৷ ইয়াৰোপৰি ৰাষ্ট্ৰীয় ৰাজনৈতিক দল বিজেপিয়েও সমানে যুঁজ দি লাভ কৰে ১২খন আসন৷ অৱশ্যে কংগ্ৰেছে ৮খন আসন লাভ কৰাৰ বিপৰীতে আকলি দলে এখন আসন লাভ কৰে৷ আপৰ সমান্তৰালকৈ শাসনাধীস্থ দল বিজেপিৰ যুঁজখনৰ দ্বাৰা আগন্তুক নিৰ্বাচনৰ কিছু দৃশ্য প্ৰতিফলিত কৰিছে৷ কংগ্ৰেছৰ শাসনত থকা পঞ্জাবৰ ৰাজনীতিৰ দিশটো ইয়াৰ পাছৰে পৰা যে অধিক প্ৰত্যাহ্বানমূলক হ’ব, সেয়া স্পষ্ট হৈ পৰিছে৷

আজি পুৱা ৩৫টা ৱাৰ্ডৰ ৯টাকৈ ভোটকেন্দ্ৰত ভোটৰ কাউণ্টিং আৰম্ভ হৈছিল৷ ভোটদানৰ শতাংশ আছিল ৬০৪৬৷ পূৰ্বে এই যুঁজখন বিজেপি আৰু কংগ্ৰেছৰ দলৰ মাজত দেখিবলৈ পোৱা গৈছিল যদিও এইবাৰ আম আদমি পাৰ্টীয়ে পৌৰসভাৰ নিৰ্বাচনত দুয়োটা দলৰ বাবে অধিক প্ৰত্যাহ্বানমূলক কৰি তুলিছে৷ শুকুৰবাৰে সম্পন্ন হৈছিল পৌৰসভাৰ নিৰ্বাচনৰ ভোটদান প্ৰক্ৰিয়া৷

নিৰ্বাচনত জয়লাভ কৰি দিল্লীৰ মুখ্যমন্ত্ৰী কেজৰিৱালে টুইটযোগে কয়, “আপৰ জয়ৰ পাছতে চণ্ডীগড় পৌৰসভা নিগমত পঞ্জাবে দেখিবলৈ পাব পৰিৱৰ্তন৷ জনতাই দুৰ্নীতিগ্ৰস্ত ৰাজনীতি প্ৰত্যাহাৰ কৰি আপক বাছনি কৰিছে৷ পঞ্জাব পৰিবৰ্তনৰ বাবে সাজু৷” কেজৰিৱালে আগন্তুক পঞ্জাব বিধানসভা নিৰ্বাচনৰ লক্ষ্য আগত ৰাখি ইতিমধ্যে ৰাজ্যখনত আৰম্ভ কৰিছে নিৰ্বাচনী প্ৰচাৰ৷