ডিজিটেল ডেস্কঃ ইছৰোৰ মুৰব্বী এছ সোমনাথে দেওবাৰে (২৭ আগষ্ট) তিৰুৱনন্তপুৰমৰ পুৰনামিকাভু ভদ্ৰকালী মন্দিৰত চন্দ্ৰযান-৩ৰ সফল অৱতৰণৰ পাছত উপস্থিত হয়। মন্দিৰত সেৱা-প্ৰাৰ্থনা কৰাৰ অন্তত তেওঁ কয় যে বিজ্ঞান আৰু আধ্যাত্মিকতা দুটা বেলেগ বস্তু আৰু দুয়োটা মিহলি কৰাৰ প্ৰয়োজন নাই।
এছ সোমনাথে কয় যে “মই এজন এক্সপ্ল’ৰাৰ। চন্দ্ৰৰ বিষয়ে জানিব বিচাৰো। বিজ্ঞান আৰু আধ্যাত্মিকতা দুয়োটাকে অন্বেষণ কৰাটো মোৰ জীৱন যাত্ৰাৰ এটা অংশ। বহু মন্দিৰলৈ যাওঁ। বহুতো শাস্ত্ৰ পঢ়ি এই বিশ্বব্ৰহ্মাণ্ডত আমাৰ অস্তিত্বৰ বিষয়ে জানিবলৈ চেষ্টা কৰোঁ।”
চন্দ্ৰযান-৩ সন্দৰ্ভত ইছৰোৰ অধ্যক্ষই সংবাদ সংস্থা এএনআইক জনাইছে যে সকলো কাম অতি ভালদৰে চলি আছে। ইয়াৰ লেণ্ডাৰ, ৰভাৰৰ অৱস্থা ভাল আৰু পাঁচোটা যন্ত্ৰ কাৰ্যক্ষম কৰি তোলা হৈছে। এতিয়া ই উৎকৃষ্ট তথ্য দিছে।তেওঁ কয় যে ৩ ছেপ্টেম্বৰৰ আগৰ আগন্তুক দিনত আমি সকলো পৰীক্ষা-নিৰীক্ষা সম্পূৰ্ণ কৰিবলৈ সক্ষম হ’ম বুলি আশা কৰা হৈছে। ইয়াৰ বিভিন্ন ধৰণৰ মোড আছে যাৰ বাবে ইয়াক পৰীক্ষা কৰিব লাগে। আমি চন্দ্ৰৰ এতিয়ালৈকে তোলা শ্ৰেষ্ঠ ফটোখন সংগ্ৰহ কৰিছোঁ৷
চন্দ্ৰযান-৩ৰ চন্দ্ৰৰ অৱতৰণ স্থানক ‘শিৱশক্তি’ বুলি নামকৰণ ওপৰত ইছৰোৰ অধ্যক্ষই কয় যে “প্ৰধানমন্ত্ৰীয়ে ইয়াৰ অৰ্থ আমাৰ সকলোৰে বাবে উপযোগী ধৰণে বুজাই দিলে। মই ভাবো ইয়াত একো দোষ নাই।” তদুপৰি ইছৰোৰ মুৰব্বীগৰাকীয়ে কয় যে প্ৰধানমন্ত্ৰীয়ে ২০১৯ চনত চন্দ্ৰযান-২এ চন্দ্ৰত ছাপ এৰি থৈ যোৱা ঠাইখনৰ নাম ত্ৰিৰংগা পইণ্ট বুলি ঘোষণা কৰাৰ লগতে ইয়াৰ অৰ্থও বুজাই দিয়ে। দুয়োটা ভাৰতীয় নাম। আমি যি কৰিছো তাৰ এটা তাৎপৰ্য থাকিব লাগে আৰু দেশৰ প্ৰধানমন্ত্ৰী হোৱাৰ বাবে ইয়াৰ নাম ৰখাটো তেওঁৰ সৌভাগ্য।
Continue Reading
