ডিজিটেল ডেস্কঃ বিশ্বকাপৰ ফাইনেলত আৰ্জেণ্টিনাৰ হাতত পৰাজয়বৰণ কৰাৰ পাছত ফ্ৰান্সৰ ৰাজপথ উত্তাল হৈ পৰে। ফ্ৰান্সৰ সমৰ্থকসকলে ৰাস্তাতে অসামাজিক কাৰ্যকলাপত লিপ্ত হৈ পৰে। বিশ্বকাপৰ পৰাজয় মানি ল’ব নোৱাৰিয়ে তেওঁলোকে ৰাজপথত বিক্ষোভ প্ৰদৰ্শন কৰে।
আনকি আৰক্ষীৰ স’তেও তেওঁলোকৰ হতাহতি হয়। পৰিস্থিতি চম্ভালিবলৈ দেশখনৰ বিভিন্ন চহৰত লাঠিচাৰ্জ আৰু কন্দুৱা গেছো এৰা হয়। গ্ৰেপ্তাৰো কৰা হৈছে কেইবাজনকো। সামাজিক মাধ্যমত এই হতাহতিৰ ফটোসমূহ ভাইৰেল হৈ পৰিছে।
উল্লেখ্য যে দেওবাৰে ফাইনেল চাবলৈ ফ্ৰান্সৰ কেইবাখনো চহৰৰ বিভিন্ন প্ৰান্তৰ আৰু ৰেষ্টুৰেণ্টত ফুটবলপ্ৰেমীসকলে জুম বান্ধিছিল। কিন্তু তেওঁলোকৰ স্বপ্নভংগ হয়। পেনাল্টি শ্বুটআউটত পৰাজীত হয় ফ্ৰান্স।
তাৰপাছতে পেৰিছ, নাইচ, লিয়’ন আদি চহৰসমূহৰ ৰাজপথ উত্তাল হৈ পৰে। ৰাজহুৱা সম্পত্তি ধ্বংসৰ উপৰিও প্ৰতিবাদকাৰীসকলে বহু পথচাৰীকো আক্ৰমণ কৰা হয় বুলি অভিযোগ উঠিছে।
জানিব পৰামতে, পৰিস্থিতি চম্ভালিবলৈ দেশখনত চৈধ হাজাৰ আৰক্ষী নমোৱা হৈছে। পেৰিছ চহৰত এতিয়ালৈকে গ্ৰেপ্তাৰ হৈছে কমেও ১১৫জন লোক।
আনহাতে, ফাইনেলৰ পাছত পেৰিছস্থিত আৰ্জেণ্টিনাৰ দূতাবাসত ব্যাপক উচ্ছাস পৰিলক্ষিত হয়। দূতাবাসত বহু আৰ্জেণ্টিনাৰ সমৰ্থকে আনন্দ উল্লাস কৰে।
Continue Reading
