ডিজিটেল ডেস্কঃ উত্তৰ প্ৰদেশৰ কৌশম্বী জিলাৰ পৰা পোহৰলৈ আহিছে এক চাঞ্চল্যকৰ ঘটনা। যৌতুকত বুলেট নোপোৱাৰ বাবে এজন দৰাই কইনা আনিবলৈ যোৱাত অস্বীকাৰ কৰে। এই কথা শুনাৰ পাছতেই কইনাগৃহত হাহাকাৰ লাগে। কেইঘণ্টামান আগলৈকে সুখী হৈ থকা মানুহবোৰৰ মনটো নিৰাশাৰে ভৰি পৰিল। এই সন্দৰ্ভত আৰক্ষীক অভিযোগ দিছে ভুক্তভোগীয়ে। সৰয়াকিল থানা এলেকাৰ চন্দনাপুৰৰ বাসিন্দা শিৱলোচনে শ্ৰমিক হিচাপে কাম কৰি পৰিয়াল চলাই আছে। প্ৰয়াগৰাজৰ ধুমনগঞ্জ ৰমমান পূৰ্বা নিবাসী ছালিগ্ৰামৰ পুত্ৰ পংকজৰ সৈতে এবছৰ পূৰ্বে কন্যা বন্দনাৰ বিয়া ঠিক হৈছিল।
পুৱাৰে পৰা বন্দনাৰ পিতৃ আত্মীয়ৰ লগত বিয়াৰ প্ৰস্তুতিত ব্যস্ত হৈ পৰিল। অতিথিৰে ভৰি পৰিল ৰভাতলী। ইফালে হঠাৎ সন্ধিয়া বন্দনাৰ মোবাইলত দৰা পংকজৰ ফোন আহিল, যৌতুকৰ বুলেট আহিল নে নাই বুলি বন্দনাক প্ৰশ্ন কৰে পংকজে। এই সন্দৰ্ভত বন্দনাই কয় যে বিয়া ঠিক হোৱাৰ আগতে যৌতুক অবিহনে বিয়া হোৱাৰ কথা আছিল, গতিকে বুলেট দিয়াৰ কোনো প্ৰশ্নই উত্থাপন নহয়।
এই কথা শুনি দৰা পংকজে ফোনযোগে বন্দনক স্পষ্টকৈ ক’লে যে ''বুলেট নিদিলে মই কইনা আনিবলৈ নাযাওঁ। দৰা হিচাপে আন কাৰোবাক বাছি লৈ তুমি বিয়া কৰাই লোৱা।'' দৰাৰ পৰা এই কথা শুনি বন্দনা আৰু তেওঁৰ পৰিয়ালটো হতভম্ব হৈ পৰিল। হঠাতে বিয়াৰ সকলো আনন্দ ধূলিসাৎ হৈ পৰিল। বিয়াৰ সকলো কাম-কাজ স্থগিত ৰখা হ’ল। আৰক্ষীৰ ওচৰত এজাহাৰ দাখিল কৰিছে যুৱতীগৰাকীৰ পিতৃয়ে। আৰক্ষীয়ে তদন্তৰ অন্তত ব্যৱস্থা গ্ৰহণ কৰা হ’ব বুলি সদৰী কৰিছে।
Continue Reading
