দীৰ্ঘদিন ধৰি উচ্চ ৰক্তচাপৰ সমস্যাত আক্ৰান্ত নেকি, সঠিকভাৱে পানী খাই ইয়াক কেনেদৰে নিয়ন্ত্ৰণ কৰিব পাৰি, জানি লওক

ডিজিটেল ডেস্ক : ব্যায়ামৰ অভাৱ, বাহিৰৰ খাদ্য খোৱাৰ প্ৰৱণতা, মানসিক উদ্বেগ—শৰীৰত শিপাই থকা কিছুমান সমস্যাৰ ভিতৰত উচ্চ ৰক্তচাপ আদি অন্তৰ্ভুক্ত। হৃদৰোগৰ দৰে সমস্যা এই ৰোগৰ পৰাই জন্ম হয়। উচ্চ ৰক্তচাপৰ সমস্যা নিয়ন্ত্ৰণত ৰখাটো অতি গুৰুত্বপূৰ্ণ। এই ৰোগত আক্ৰান্ত লোকৰ সংখ্যা দিনকদিনে বৃদ্ধি পাইছে। ভাৰতবৰ্ষত প্ৰতি বছৰে ১০ লাখতকৈ অধিক লোক এই ৰোগত আক্ৰান্ত হয়। উচ্চ ৰক্তচাপৰ বাবে ধমনীবোৰৰ ভিতৰৰ বেৰত থকা বিভিন্ন কোষৰ ক্ষতি হয়। ফলত শৰীৰত ধমনীৰ কাৰ্যকলাপত অস্বাভাৱিকতা দেখা যায়। উচ্চ ৰক্তচাপে মগজুতো প্ৰভাৱ পেলায়। ফলত পাছলৈ স্মৃতিশক্তি হেৰুওৱাৰ দৰে সমস্যাৰ সৃষ্টি হ’ব পাৰে।

 উচ্চ ৰক্তচাপৰ সমস্যা নিয়ন্ত্ৰণৰ বাবে দৈনন্দিন জীৱনত কিছু পৰিৱৰ্তন কৰিবলৈ চিকিৎসকে পৰামৰ্শ দিয়ে। খাদ্য খোৱাৰ ওপৰত থকা বাধাৰ উপৰি তেওঁক নিয়মিতভাৱে ব্যায়াম কৰিবলৈও কোৱা হয়। উচ্চ ৰক্তচাপৰ সমস্যা কম কৰিবলৈ অধিক পানী খাব লাগে বুলিও চিকিৎসকে কয়। এই ৰোগত শৰীৰ আৰ্দ্ৰ কৰি ৰখাটো প্ৰয়োজন। শৰীৰত পানীৰ অভাৱ হ’লে সমস্যাটো গুৰুতৰ হৈ উঠিব পাৰে। আমেৰিকান হাৰ্ট এছ’চিয়েচনৰ মতে ৰক্তচাপৰ সমস্যাৰ পৰা হাত সাৰিবলৈ অধিক পানী খোৱাতো প্ৰয়োজন। বিশ্ব স্বাস্থ্য সংস্থা (WHO)ৰ মতে অধিক পানী খোৱাৰ উপৰি মানসিক চাপ কমোৱা, ধূমপান নকৰা, ওজন নিয়ন্ত্ৰণ আদিও ৰক্তচাপৰ সমস্যা নিয়ন্ত্ৰণৰ বাবে প্ৰয়োজনীয়। কিন্তু উচ্চ ৰক্তচাপৰ সমস্যা কম কৰিবলৈ প্ৰতিদিনে কিমান পানী সেৱন কৰিব লাগে?

 হৃদৰোগ বিশেষজ্ঞৰ মতে উচ্চ ৰক্তচাপ ৰোগীয়ে দিনটোত কমেও ৭-৮ গিলাচ পানী খাব লাগে। পানীয়ে তেজ বিশুদ্ধ কৰাত সহায় কৰে। পানীয়ে তেজৰ পৰা বিভিন্ন আৱৰ্জনা আঁতৰাই পেলায়। পুষ্টিবিদসকলে অৱশ্যে পানী সেৱনৰ লগতে ৰক্তচাপ নিয়ন্ত্ৰণত ক্ৰেনবেৰীৰ ৰসৰ উপকাৰিতাৰ কথা উল্লেখ কৰে। ভিটামিন-চি আৰু এন্টিঅক্সিডেন্টৰে সমৃদ্ধ এই ফলবিধে বিভিন্ন প্ৰদাহৰ বিৰুদ্ধে যুঁজ দিয়াত সহায় কৰাৰ লগতে তেজৰ সোঁত উন্নত কৰে।