ডিজিটেল ডেস্কঃ দেশৰ প্ৰায় ৬৭ শতাংশ শিশু আৰু ৫৭ শতাংশ মহিলাই ভুগিছে ৰক্তহীনতাত।ৰাষ্ট্ৰীয় পৰিয়াল স্বাস্থ্য জৰীপৰ অফিচিয়েল ৱেবছাইটত উপলব্ধ তথ্য অনুসৰি ভাৰতৰ প্ৰায় ৬৭ শতাংশ শিশু আৰু ৫৭ শতাংশ মহিলা ৰক্তহীনতাত ভুগি আছে।
ৰাষ্ট্ৰীয় পৰিয়াল স্বাস্থ্য জৰীপ ২০১৯-২১ ৰ তথ্যই দেশত ৰক্তহীনতাৰ বিষয়ে উদ্বেগজনক পৰিসংখ্যা প্ৰকাশ কৰিছে । প্ৰতিবেদনত কোৱা হৈছে যে ১৫ ৰ পৰা ৪৯ বছৰ বয়সৰ ৫৭ শতাংশ ছোৱালী তথা মহিলা ৰক্তহীনতাত আক্ৰান্ত। তথ্যই প্ৰমাণ কৰিছে যে গ্ৰাম্য অঞ্চলত ৰক্তহীনতা অধিক ভয়াৱহ হৈ উঠিছে। য'ত ১৫ ৰ পৰা ৪৯ বছৰ বয়সৰ ৫৮.৫ % মহিলা আৰু ১৫ ৰ পৰা ১৯ বছৰ বয়সৰ ৬০.২ % ছোৱালী ৰক্তহীনতাৰ চিকাৰ হৈছে।
আনহাতে চহৰাঞ্চলৰ ৫৩.৮% মহিলা আৰু ৫৬.৫% ছোৱালী ৰক্তহীনতাত আক্ৰান্ত। জৰীপৰ তথ্যই এই কথাও প্ৰকাশ কৰিছে যে ভাৰতত ৬ ৰ পৰা ৫৯ মাহ বয়সৰ প্ৰায় ৬৭.১% শিশু ৰক্তহীনতাত ভুগিছে। উল্লেখ্য ৯ ফেব্ৰুৱাৰীত মহিলা আৰু শিশু বিকাশ মন্ত্ৰী স্মৃতি ইৰাণীয়ে সংসদত দিয়া উত্তৰত ৰাষ্ট্ৰীয় পৰিয়াল স্বাস্থ্য জৰীপৰ অফিচিয়েল ৱেবছাইটত উপলব্ধ ২০১৯-২১ বৰ্ষৰ জৰীপৰ তথ্য অন্তৰ্ভুক্ত আছিল।
Continue Reading
