ডিজিটেল ডেস্কঃ দেশত বাঢ়িছে মাছ খোৱাৰ পৰিমাণ। বিত্তীয় গৱেষণা সংস্থা নেচনেল কাউন্সিল অৱ এপ্লাইড ইকনমিক ৰিচাৰ্চ (এনচিএইআৰ)ৰ এক অধ্যয়নত কোৱা হৈছে যে দহ বছৰত দেশত মাছৰ ভক্ষণ দুগুণ বৃদ্ধি পাইছে। এতিয়া এজন ব্যক্তিয়ে বছৰি ১৩ কেজিতকৈ অধিক মাছ খায়।
২০১১-১২ চনত চৰকাৰী সমীক্ষাত দেখা গৈছিল যে বাৰ্ষিক জনমূৰি মাছ খোৱাৰ পৰিমাণ মাত্ৰ ৭ কিলোগ্ৰাম। ২০২২-২৩ চনত এনচিএইআৰৰ জৰীপত ই ১৩ কিলোগ্ৰামৰ ওপৰলৈ বৃদ্ধি পায়। সমীক্ষাত ৫৬ শতাংশ পৰিয়ালে কয় যে বজাৰত বিভিন্ন ধৰণৰ মাছ পালে খোৱাৰ পৰিমাণ বৃদ্ধি পায়। মাত্ৰ ১৯ শতাংশ পৰিয়ালেহে কয় যে যেতিয়া মাছৰ দাম কম হয় তেতিয়া মাছৰ খোৱাৰ পৰিমাণ বৃদ্ধি পায়।
মাছ খোৱাৰ লগে লগে মাছ ক্ৰয়ৰ খৰচো বাঢ়িছে। দহবছৰ আগতে যদি এটা পৰিয়ালে বজাৰত হাজাৰ টকা খৰছ কৰিছিল, তেন্তে মাছত মাত্ৰ ৭৬ টকা খৰচ হ’লহেঁতেন। এতিয়া যদি ১০০০ টকীয়া বজাৰ আছে তেন্তে ১৬৮ টকীয়া মাছত খৰছ কৰা হৈছে। সেই সময়ত এটা পৰিয়ালে মাহে গড়ে ২.৬৬ কেজি মাছ খাইছিল। এতিয়া ইয়াৰ ওজন প্ৰায় ৫ কেজি হৈছেগৈ। সমীক্ষাত ২৮ শতাংশ লোকে কয় যে যোৱা পাঁচ বছৰত তেওঁলোকৰ মাছ খোৱাৰ পৰিমাণ বৃদ্ধি পাইছে। ঘৰতে মাছ ৰন্ধা ধাৰা আৰু মাছৰ জৰিয়তে পুষ্টিকৰ মূল্য নিশ্চিত কৰাৰ হেঁপাহ ইয়াৰ বাবে দায়ী বুলি বিশ্বাস কৰা হয়।
কিন্তু এনচিএইআৰৰ গৱেষকসকলে কয় যে যোৱা দহ বছৰত মাছ খোৱাৰ পৰিমাণ বৃদ্ধি পোৱাৰ পাছতো আন্তঃৰাষ্ট্ৰীয় মানদণ্ডৰ তুলনাত ভাৰতৰ মাছ খোৱাৰ পৰিমাণ এতিয়াও কম। ৰাষ্ট্ৰসংঘৰ সংস্থা FAO (Food and Agriculture Organization) আৰু OECD (Organization for Economic Cooperation and Development)ৰ হিচাপ অনুসৰি বিশ্বত প্ৰতিজন ব্যক্তিয়ে বছৰি ২০.৫ কিলোগ্ৰাম মাছ খায়। ২০৩১ চনত ই ২১.৪ কিলোগ্ৰামলৈ যাব। আৰ্থিক বৃদ্ধি, মানুহৰ আয় বৃদ্ধি হ’লে মাছ খোৱাৰ পৰিমাণো বৃদ্ধি পাব।
কেন্দ্ৰীয় চৰকাৰৰ মীন বিভাগে ২০২২ চনৰ প্ৰতিবেদনত উল্লেখ কৰিছে যে দেশৰ ভিতৰতে সৰ্বাধিক মাছ খায় লক্ষদ্বীপবাসীয়ে। প্ৰতি বছৰে জনমূৰি ১২৫ কিলোগ্ৰাম। ৰাজ্যসমূহৰ ভিতৰত গোৱাৰ মানুহে সৰ্বাধিক মাছ সেৱন কৰে। প্ৰতি বছৰে জনমূৰি ৭৮ কিলোগ্ৰাম। ত্ৰিপুৰা, ওড়িশাৰ মানুহো মাছ খোৱাৰ ক্ষেত্ৰত পিছ পৰি থকা নাই।
Continue Reading
