ডিজিটেল ডেস্কঃ ডেটিং এপৰ মাধ্যমেৰে কেইবাগৰাকী মহিলাৰ স’তে সম্পৰ্ক গঢ়ি প্ৰৱঞ্চনা কৰি অৱশেষত ৰঙাঘৰত সোমাল এগৰাকী দুধূৰ্ষ প্ৰতাৰক। নাম তেওঁৰ পেট্ৰিক গিবলিন। আমেৰিকা যুক্তৰাষ্ট্ৰত বাস কৰা এই প্ৰতাৰকগৰাকীৰ বয়স ৫৮ বছৰ। প্ৰায় দুই দশক ধৰি প্ৰেমৰ জালত পেলাই অসংখ্য মহিলাৰ পৰা এওঁ আদায় কৰিছিল কোটি কোটি টকা।
ইয়াৰ পূৰ্বেও আৰক্ষীৰ জালত কেইবাবাৰো পৰিছিল পেট্ৰিক। কিন্তু সাৰি যাবলৈ সক্ষম হৈছিল। কিন্তু কি এনে কাম কৰে পেট্ৰিকে, যাৰ ফলত মহিলাসকলে তেওঁৰ প্ৰতি আকৃষ্ট হয়?
পেট্ৰিকে প্ৰথমে ডেটিং এপৰ মাধ্যমেৰে মহিলাৰ স’তে যোগাযোগ কৰে। ধীৰে ধীৰে বন্ধুত্বৰ সম্পৰ্ক গঢ়ে। মহিলাসকলৰ আগত পেট্ৰিকে কয় যে তেওঁ বিপুল সম্পত্তিৰ গৰাকী।
পেট্ৰিকে মূলতঃ নিৰাশাত ভোগা মহিলাসকলকে নিজৰ চিকাৰ হিচাপে বাচি লয়। দুখী মহিলাসকলক সুখৰ স্বৰ্গ দেখুওৱাৰ সপোন যাচে তেওঁ। বন্ধুত্ব আগুৱালেই মহিলাসকলৰ পৰা বিভিন্ন অজুহাত দেখুৱাই টকা ধাৰে খুঁজে তেওঁ।
কিন্তু এবাৰ টকা পোলাৰ পাছত পেট্ৰিকৰ কোনো সন্ধান নাপায় তেওঁৰ বান্ধৱীসকলে। কেতিয়াও ঘূৰাই নাপায় টকা। প্ৰতাৰণাৰ এই অভিযোগত দুবাৰ জেলো খাটিছিল তেওঁ। কিন্তু জেলৰ পৰাই পলাই যাবলৈ সক্ষম হৈছিল।
সম্প্ৰতি পুনৰ আৰক্ষীৰ জালত পৰিছে পেট্ৰিক। আদালতে ৬৬ মাহ কাৰাবাস খটাৰ নিৰ্দেশ দিছে পেট্ৰিকক। আৰক্ষীয়ে জনোৱামতে, বৰ্তমানলৈকে কমেও ১০০ গৰাকী মহিলাক প্ৰতাৰণা কৰিছে পেট্ৰিকে। প্ৰায় দুই দশক ধৰি প্ৰেমৰ প্ৰতাৰণাৰে আহৰণ কৰিছে আঢ়ৈ লাখ ডলাৰ। ভাৰতীয় মূল্য অনুযায়ী ইয়াৰ পৰিমাণ হ’ব প্ৰায় ২ কোটি ৬ লাখ।
Continue Reading
