দিৱালীৰ ফটকা ফুটোৱাক লৈ হতাহতিত প্ৰাণ গ’ল এজন যুৱকৰ, ক’ত?

ডিজিটেল ডেস্কঃ দিৱালীৰ ফটকাক লৈ মতবিৰোধৰ ফলতে প্ৰাণ গ’ল এজন যুৱকৰ। মৰ্মান্তিক ঘটনাটো সংঘটিত হৈছে মুম্বাইত।

জানিব পৰা মতে, ২১ বৰ্ষীয় সুনীল নাইডু নামৰ লোকজনে তিনিজন কিশোৰৰ স’তে ফটকা ফুটোৱাক লৈ তৰ্ক-বিতৰ্কত লিপ্ত হয়। ফলশ্ৰুতিত কিশোৰ তিনিজনে নাইডুক চুৰিকাঘাট কৰি হত্যা কৰে।

মুম্বাইৰ শিৱাজী নগৰৰ পৰেখ কম্পাউডত কিশোৰকেইজনে কাঁচৰ বটলত ফটকা ফুটাই আছিল। কিন্তু নাইডু আহি উক্ত স্থানত উপস্থিত হয় আৰু ইয়াৰ বিৰোধ কৰে।

ফলত উত্তপ্ত পৰিস্থিতিৰ সৃষ্টি হয়। নাইডুক কিশোৰকেইজনে মাৰ-পিট কৰি শেষত গুৰুত্বৰভাৱে চুৰিকাঘাত কৰে। তাৰপাছতে নাইডুক হস্পিতাললৈ লৈ যোৱা হয়। হস্পিতালতে তেওঁক মৃত বুলি ঘোষণা কৰা হয়।

আৰক্ষীয়ে প্ৰকাশ কৰা মতে, অভিযুক্ত কিশোৰকেইজনৰ বয়স ক্ৰমে ১৪, ১৫, আৰু ১২ বছৰ। ইয়াৰ মাজৰে ১২ বৰ্ষীয় কিশোৰজনক এতিয়াও আৰক্ষীয়ে বিচাৰি আছে।

উল্লেখ্য যে দিৱালীৰ ফটকাক লৈ সম্প্ৰতি দেশজুৰি বিতৰ্কৰ সৃষ্টি হৈ আছে। দেশৰ কেইবাখনো চহৰত ইয়াক নিষিদ্ধও কৰা হৈছে। কিন্তু তৎসত্বেও ফটকা-আতচবাজীৰ প্ৰচলন হৈয়েই আছে।