ডিজিটেল ডেস্ক: ২১ মাৰ্চৰ নিশা দিল্লীৰ সুৰা কেলেংকাৰিৰ অভিযোগত ইডিয়ে গ্ৰেপ্তাৰ কৰিছিল আপ নেতা তথা দিল্লীৰ মুখ্যমন্ত্ৰী অৰবিন্দ কেজৰিৱালক। সম্প্ৰতি ছদিনৰ বাবে ইডিৰ জিম্মাত আছে মুখ্যমন্ত্ৰীগৰাকী। যাক সততে জনা যায় এক ব্যতিক্ৰমী ৰাজনীতিক হিচাপে। যি ধাৰা অব্যাহত ৰাখিলে অৰবিন্দ কেজৰিৱালে। ইডিৰ জিম্মাৰ পৰাই আৰম্ভ কৰিলে দিল্লী চৰকাৰৰ কাম–কাজ। আজি দিল্লীৰ জলসংকটক লৈ কাৰাগাৰৰ পৰাই প্ৰথমটো চৰকাৰী নিৰ্দেশ জাৰি কৰিলে ইডিয়ে গ্ৰেপ্তাৰ কৰা মুখ্যমন্ত্ৰী অৰবিন্দ কেজৰিৱালে। আপ চৰকাৰৰ মন্ত্ৰী আতিশী মাৰ্লেনাক দিল্লীৰ পানীৰ নাটনি ঘটা অঞ্চলত শীঘ্ৰেই পানীৰ টেংকাৰৰ ব্যৱস্থা কৰাৰ বাবে কাৰাগাৰৰ পৰাই নিৰ্দেশ জাৰি কৰিলে কেজৰিৱালে।
ইপিনে, কেজৰিৱালৰ গ্ৰেপ্তাৰৰ পাছত বিৰোধী ইণ্ডিয়া মৰ্চাই আজি আহ্বান কৰিলে সংবাদমেলৰ। ৩১ মাৰ্চত দিল্লীৰ ৰামলীলা ময়দানত কেজৰিৱালক গ্ৰেপ্তাৰৰ বিৰুদ্ধে প্ৰতিবাদী ৰেলীৰ ঘোষণা ইণ্ডিয়া মৰ্চাৰ। আজি সংবাদমেলত বিৰোধী নেতাসকলে কেজৰিৱালৰ গ্ৰেপ্তাৰক লৈ তীব্ৰ সমালোচনা কৰিলে কেন্দ্ৰীয় চৰকাৰক।
আনহাতে, কেজৰিৱালৰ গ্ৰেপ্তাৰৰ পাছত আজি প্ৰথমবাৰৰ বাবে বৈঠকৰ আয়োজন কৰিলে আম আদমী পাৰ্টীয়ে। য’ত আম আদমী পাৰ্টীয়ে যুগুত কৰি উলিয়ালে দলটোৰ পৰৱৰ্তী ৰণনীতি। তাৰ পূৰ্বে দিল্লীৰ ITOত কেজৰিৱালৰ সমৰ্থনত ধৰ্ণাত বহিল আপ নেতা–কৰ্মীয়ে। আনহাতে, আজি দিল্লী বিজেপিৰ নেতা–কৰ্মীসকলে অৰবিন্দ কেজৰিৱালৰ বিৰুদ্ধে অংশ ল’লে এক প্ৰতিবাদী কাৰ্যসূচীত। য’ত কেজৰিৱালক ভ্ৰষ্টচাৰী আখ্যা দি মুখৰিত হ’ল বিজেপিৰ কৰ্মীসকল।
ইপিনে, আপ নেতা সৌৰভ ভৰদ্বাজে ইলেক্ট’ৰেল বণ্ড প্ৰসংগত তীব্ৰ সমালোচনা কৰে বিজেপিক। কেজৰিৱালক গ্ৰেপ্তাৰ কৰা সুৰা কেলেংকাৰিৰ কিংপিন ৰূপে চিনাক্ত ব্যৱসায়ীৰ পৰা বিজেপিয়ে ৬০ কোটি টকাৰ চান্দা সংগ্ৰহৰ অভিযোগ আপ নেতাগৰাকীৰ।
Continue Reading
