ডিজিটেল ডেস্কঃ কাটাৰ বিশ্বকাপৰ পৰা ব্ৰাজিলৰ অনাকাংক্ষিত প্ৰস্থানৰ পিছতেই দলটোৰ প্ৰশিক্ষকৰ পদ ত্যাগ কৰিছিল টিটেই। কিন্তু তৎসত্বেও প্ৰশিক্ষকগৰাকীৰ ওপৰত ব্ৰাজিলৰ ফুটবলপ্ৰেমীসকলৰ মনৰ পৰা ক্ষোভ আঁতৰা নাই।
ব্ৰাজিলৰ এখন বাতৰি কাকতে প্ৰকাশ কৰা মতে, যোৱা সপ্তাহত ৰিঅ’ত তেওঁৰ ঘৰৰ সন্মুখত এজন ব্যক্তিয়ে তেওঁক মাৰ ধৰ কৰিছিল। আৰক্ষীয়ে ইতিমধ্যে ইয়াৰ তদন্ত আৰম্ভ কৰিছে।
প্ৰতিবেদন অনুসৰি, টিটে যোৱা সপ্তাহত তেওঁৰ পত্নীৰ সৈতে ৰাতিপুৱা ঘৰৰ বাহিৰলৈ খোজ কাঢ়িবলৈ গৈছিল। সেই সময়তে এজন অচিনাক্ত ব্যক্তিয়ে তেওঁৰ কান্ধত আঘাত কৰে। লোকজনে তেওঁৰ ডিঙিৰ চেইনডালো কাঢ়ি লয়। '’ব্ৰাজিলে কিয় কাটাৰ বিশ্বকাপৰ পৰা এনেদৰে বিদায় ল’লে’’- মানুহজনে টিটেৰ পৰা এই প্ৰশ্নটোৰ উত্তৰ বিচাৰিছিল।
অৱশ্যে, প্ৰাথমিক অনুসন্ধানৰ পিছত আৰক্ষীয়ে কৈছিল যে লোকজনে টিটেৰ চুবুৰীয়াৰ বাগিচাত বান্ধি থোৱা চাইকেল চুৰি কৰিবলৈ চেষ্টা কৰি আছিল। সেই সময়ত তেওঁক বাধা দিবলৈ চেষ্টা কৰোঁতে তেওঁ শাৰীৰিকভাৱে হাৰাশাস্তিৰ সন্মুখীন হয়। পত্নীয়ে টিটেক বচাবলৈ আগবাঢ়ি অহাত পৰিস্থিতি বিষম দেখি লোকজন পলাই যায়।
কাটাৰৰ পৰা পৰাজয়ৰ গ্লানি লৈ উভতি অহাৰ পিছত টিটে কোনো সংবাদ মাধ্যমৰ সন্মুখীন হোৱা নাই নাই। তেওঁৰ পত্নী আৰু পৰিয়ালৰ আন সদস্যসকলৰ সৈতে ৰিঅ’ত ঘৰতে দিন কটাইছে।
Continue Reading
