দলবদ্ধ ধৰ্ষণৰ অভিযোগত সাঙোৰ খাইছে এগৰাকী বিজেপি মন্ত্ৰীৰ পুত্ৰ, ক’ত?

ডিজিটেল ডেস্কঃ দলবদ্ধ ধৰ্ষণৰ গোচৰত সাঙোৰ খাইছে ত্ৰিপুৰাৰ এগৰাকী বিজেপি মন্ত্ৰীৰ পুত্ৰৰ নাম। বিষয়টো লৈ ৰাজ্যখনৰ ৰাজনৈতিক পৰিস্থিতি উত্তপ্ত হৈ পৰিছে।

বাতৰি অনুযায়ী, ৰাজ্যখনৰ উনাকটি জিলাৰ কুমাৰঘাটত এগৰাকী ষোল্ল বছৰীয়া নাবালিকা কিশোৰীক দলবদ্ধ ধৰ্ষণ কৰা হৈছিল। ১৯ অক্টোবৰত হোৱা এই কাণ্ডত তিনিজনকৈ অভিযুক্তক আৰক্ষীয়ে গ্ৰেপ্তাৰ কৰিছে।

অভিযুক্তকেইজনৰ উপৰিও ত্ৰিপুৰা চৰকাৰৰ শ্ৰমমন্ত্ৰী ভগৱান দাসৰ পুত্ৰও ইয়াত জড়িত আছে বুলি জানিব পৰা গৈছে। তাকে লৈ বিৰোধী দলসমূহে বুধবাৰে মন্ত্ৰীপুত্ৰক গ্ৰেপ্তাৰ কৰাৰ দাবীত সৰৱ হৈ পৰে।

কংগ্ৰেছে এইক্ষেত্ৰত মুখ্যমন্ত্ৰী মানিক সাহাই মুখ খোলাৰ দাবী কৰিছে। তদুপৰি কংগ্ৰেছে অভিযোগ কৰে যে অভিযুক্তৰ তালিকাৰ পৰা মন্ত্ৰীপুত্ৰগৰাকীৰ নাম আঁতৰাবলৈ ভুক্তভোগী পৰিয়ালটোৰ ওপৰত হেঁচা প্ৰয়োগ কৰা হৈছে।

কংগ্ৰেছৰ উপৰিও তৃণমূল কংগ্ৰেছ, চিপিআইএমেও বিষয়টো লৈ সৰৱ হৈ পৰিছে। আনহাতে, শাসনাধীষ্ঠ বিজেপিয়ে সকলো অভিযোগ নস্যাৎ কৰিছে।