দুখনকৈ জুৱেলাৰীত সোণ চুৰি! গ্ৰেপ্তাৰৰ নিৰ্দেশ কেন্দ্ৰীয় মন্ত্ৰী তথা বিজেপি সাংসদ নিশিথ প্ৰামাণিকৰ বিৰুদ্ধে

ডিজিটেল ডেস্কঃ সোণ চুৰি কৰাৰ দৰে জঘন্য অভিযোগ উত্থাপন অভিযোগ হৈছে এগৰাকী কেন্দ্ৰীয় মন্ত্ৰীৰ বিৰুদ্ধে। কেন্দ্ৰীয় গৃহ মন্ত্ৰী নিশিথ প্ৰামাণিকৰ বিৰুদ্ধে এই অভিযোগৰ ভিত্তিত এখনি গ্ৰেপ্তাৰি পৰোৱনাও জাৰি কৰা হৈছে। পশ্চিমবংগৰ আলিপুৰদুৱাৰৰ জুডুতিয়েল ম্যেজিষ্ট্ৰেট থাৰ্ড কোৰ্টত এই ৰায় প্ৰদান কৰা হৈছে।

জানিব পৰা মতে, ২০০৯ চনত আলিপুৰদুৱাৰ চহৰত দুখনকৈ জুৱেলাৰীত সোণ চুৰিৰ ঘটনা ঘটিছিল। দুয়োটা ঘটনাতে বিজেপি নেতা নিশীথ প্ৰামাণিক অভিযুক্ত আছিল। তাৰ ভিত্তিতে এই ৰায় প্ৰদান কৰিছে আদালতে।

অহা ৯ ডিচেম্বৰৰ ভিতৰত প্ৰামাণিকক গ্ৰেপ্তাৰ কৰি আদালতত হাজিৰ কৰোৱা হ’ব বুলিও জানিব পৰা গৈছে।

উল্লেখ্য যে ২০০৯ চনত পশ্চিমবংগৰ আলিপুৰদুৱাৰ চহৰৰ বাদলনগৰত জয়গুৰু জুৱেলাৰ্চত এই চুৰিৰ ঘটনাটো সংঘটিত হৈছিল। সেই বৰ্ষৰ ২ মে’ত আলিপুৰদুৱাৰ থানাত এটা অভিযোগ জমা দিয়ে জুৱেলাৰীখনৰ মালিক ৰতন ঘোষে।

একেটা মাহতে চহৰখনৰ লাগোৱা বীৰপাৰাৰ পাল জুৱেলাৰ্চত আন এটা সোণ চুৰিৰ ঘটনা ঘটে। দুয়োখন দোকানতে চুৰিৰ ঘটনাত অভিযুক্ত আছিল কেন্দ্ৰীয় গৃহমন্ত্ৰী প্ৰামাণিক।

ভাৰতীয় দণ্ডবিধিৰ কেইবাটাও ধাৰা অনুযায়ী প্ৰামাণিকৰ বিৰুদ্ধে গোচৰ ৰুজু কৰা হৈছিল। তাৰ ভিত্তিতে ১১ নৱেম্বৰ তাৰিখে আলিপুৰদুৱাৰৰ আদালতে মন্ত্ৰীগৰাকীৰ বিৰুদ্ধে গ্ৰেপ্তাৰী পৰোৱানা জাৰি কৰিছে।