দুৰ্নীতিৰ অভিযোগত গ্ৰেপ্তাৰ হ’ল দুৰ্নীতিৰ বিৰুদ্ধেই জেহাদ ঘোষণা কৰা কেজৰিৱাল! চাও আহক ৰাষ্ট্ৰীয় ৰাজনীতিত দিল্লীৰ মুখ্যমন্ত্ৰীগৰাকীৰ পৰিক্ৰমা

উল্লেখ্য যে বিজেপি তথা প্ৰধানমন্ত্ৰী নৰেন্দ্ৰ মোদীৰ তীক্ষ্ণ সমালোচক হিচাপে আৰম্ভণিৰে পৰাই অৰবিন্দ কেজৰিৱালে আগস্থান লাভ কৰি আহিছে। কেজৰিৱালৰ অনেক সমৰ্থকে তেওঁক ভাৰতৰ প্ৰধানমন্ত্ৰীৰ আসনতো চাব বিচাৰে। এতিয়া লোকসভা নিৰ্বাচনৰ পূৰ্বে ৰাজনৈতিক অভিসন্ধিতে কেন্দ্ৰই কেজৰিৱালক গ্ৰেপ্তাৰ কৰিছে নেকি? এইখিনিতে চাও আহক কেজৰিৱালৰ ৰাজনৈতিক যাত্ৰা আৰু কিদৰে তেওঁ মোদী চৰকাৰৰ অন্যতম বিৰোধী হিচাপে নিজকে প্ৰতিষ্ঠা কৰিলে-

এসময়ত কেজৰিৱাল আয়কৰ বিভাগত কৰ্মৰত আছিল। সেই সময়তে কেজৰিৱাল, মনীষ চিছ’দিয়া আদিয়ে দিল্লীত ৰাজহুৱা বিতৰণ বিভাগসম্পৰ্কীয় "পৰিৱৰ্তন" নামৰ এটা সংস্থা গঠন কৰে। পাছলৈ 'কবিৰ’ নামৰ এটা এনজিঅ’ আৰু তথ্য অধিকাৰ আইনৰ স’তেও জড়িত হৈ পৰে কেজৰিৱাল। সেই সময়ছোৱাত কেইবাটাও জনহিতৈষী কাৰ্যপন্থা হাতত লৈ কেজৰিৱাল সামাজিক কৰ্মী হৈ পৰিছিল। ২০১০ চনত তেওঁৰ জনপ্ৰিয়তা দেশজুৰি বিয়পি পৰে। আন্না হাজাৰেৰ নেতৃত্বত জনলোকপাল আন্দোলনে দেশ কঁপাই তোলে। তাৰ অন্যতম সেনাপতি আছিল কেজৰিৱাল। 

২০১১ চনত কেজৰিৱালে আন্না হাজাৰে আৰু কিৰণ বেদীকে ধৰি আন কেইবাজনো কৰ্মীৰ সৈতে যোগ দি ইণ্ডিয়া এগেইনষ্ট কৰ্পচন (আই এ চি) গোট গঠন কৰে। এই অভিযানৰ বিকাশ ঘটি ২০১১ চনৰ ভাৰতীয় দুৰ্নীতি বিৰোধী আন্দোলনলৈ পৰিণত হয়। আন্না হাজাৰেই অনশনৰ আয়োজন কৰে। ২০১২ চনৰ পৰা কেজৰিৱাল এই আন্দোলনৰ মুখ হিচাপে স্থান লাভ কৰে। কেজৰিৱাল আৰু অন্যান্য কৰ্মীসকলে ৰাজনীতিত প্ৰৱেশ কৰি নিৰ্বাচনত অৱতীৰ্ণ হোৱাৰ সিদ্ধান্ত লয়। ২০১২ চনৰ নৱেম্বৰ মাহত তেওঁলোকে আনুষ্ঠানিকভাৱে আম আদমী পাৰ্টি আৰম্ভ কৰে; কেজৰিৱাল দলৰ ৰাষ্ট্ৰীয় আহ্বায়ক হিচাপে নিৰ্বাচিত হয়। আপ স্থাপনৰ ফলত কেজৰিৱাল আৰু হাজাৰেৰ মাজত বিবাদৰ সৃষ্টি হয়।

২০১৩ চনৰ দিল্লী বিধানসভাৰ নিৰ্বাচনত আপে প্ৰতিদ্বন্দ্বিতা কৰাৰ সিদ্ধান্ত লয়, কেজৰিৱালে বৰ্তমানৰ মুখ্যমন্ত্ৰী শ্বিলা দীক্ষিতৰ বিৰুদ্ধে প্ৰতিদ্বন্দ্বিতা কৰে। নিৰ্বাচনটোত মুঠ ৭০খন আসনৰ ভিতৰত ভাৰতীয় জনতা পাৰ্টিয়ে ৩১খন আসন লাভ কৰে, তাৰ পিছতে আম আদমী পাৰ্টিয়ে ২৮খন আসন লাভ কৰে। কেজৰিৱালে তেওঁৰ সমষ্টিত ভাৰতীয় জাতীয় কংগ্ৰেছৰ সেই সময়ৰ মুখ্যমন্ত্ৰী শীলা দীক্ষিতক ২৫,৮৬৪ টা ভোটৰ ব্যৱধানত পৰাস্ত কৰে। আপে আঠজন আইএনচি বিধায়ক, এজন জনতা দলৰ বিধায়ক আৰু এজন স্বতন্ত্ৰ বিধায়কৰ বাহিৰৰ সমৰ্থনত উলোমা সংখ্যালঘু চৰকাৰ গঠন কৰে। কিন্তু ২০১৪ চনৰ ১৪ ফেব্ৰুৱাৰীত দিল্লী বিধানসভাত জন লোকপাল বিধেয়ক দাখিল কৰিব নোৱাৰাৰ বাবে মুখ্যমন্ত্ৰী পদৰ পৰা পদত্যাগ কৰে। তেওঁ বিধানসভা ভংগ কৰাৰ পৰামৰ্শ আগবঢ়ায়।

২০১৫ চনত পুনৰ দিল্লী বিধানসভা নিৰ্বাচন হয়। কেজৰিৱালৰ নেতৃত্বত আম আদমী পাৰ্টিয়ে ৭০টা সমষ্টিৰ ভিতৰত ৬৭টা সমষ্টিত জয়লাভ কৰি বিজেপিয়ে তিনিখন আসন আৰু কংগ্ৰেছে কোনো আসন নাপালে। সেই নিৰ্বাচনত তেওঁ পুনৰ নতুন দিল্লী সমষ্টিৰ পৰা নিৰ্বাচিত হয় আৰু নুপুৰ শৰ্মাক ৩১,৫৮৩ টা ভোটত পৰাস্ত কৰে। ২০১৫ চনৰ ১৪ ফেব্ৰুৱাৰীত তেওঁ দ্বিতীয়বাৰৰ বাবে ৰামলীলা ময়দানত দিল্লীৰ মুখ্যমন্ত্ৰী হিচাপে শপত গ্ৰহণ কৰে তেতিয়াৰ পৰাই তেওঁৰ দলটোৱে  জন লোকপাল বিধেয়ক গৃহীত কৰে। কেজৰিৱালৰ মুখ্যমন্ত্ৰী হিচাপে দ্বিতীয় কাৰ্যকালত কেজৰিৱালৰ কাৰ্যালয় আৰু দিল্লীৰ উপ-ৰাজ্যপালৰ কাৰ্যালয়ৰ মাজত দীৰ্ঘদিনীয়া বিবাদ চলি আহিছে। কিছুমান উল্লেখযোগ্য ৰাজহুৱা নিযুক্তিকে ধৰি চৰকাৰৰ বিভিন্ন দিশৰ বাবে কোনটো কাৰ্যালয়ৰ চূড়ান্ত দায়িত্ব আছে সেই সম্পৰ্কে বিভিন্ন বিষয় জড়িত হৈ পৰিছে।

২০২০ চনৰ দিল্লী বিধানসভাৰ নিৰ্বাচনত আপে ৭০খন আসনৰ ভিতৰত ৬২খন আসন লাভ কৰে। ২০২০ চনৰ ১৬ ফেব্ৰুৱাৰীত তেওঁ তৃতীয়বাৰৰ বাবে ৰামলীলা ময়দানত দিল্লীৰ মুখ্যমন্ত্ৰী হিচাপে শপত গ্ৰহণ কৰে।

উল্লেখ্য যে এই বিগত সময়ছোৱাত বহুবাৰ তেওঁ নৰেন্দ্ৰ মোদী তথা বিজেপি চৰকাৰৰ মূৰৰ কামোৰণি হৈ আহিছে। প্ৰধানমন্ত্ৰী শিক্ষাগত অৰ্হতাৰ পৰা মোদী চৰকাৰবিৰোধী যিকোনো প্ৰতিবাদতে কেজৰিৱালে অংশগ্ৰহণ আৰু সমৰ্থন জনাই আহিছে। সেইবাবেই আক্ৰোশৰ বলি হ’ল নেকি দিল্লীৰ মুখ্যমন্ত্ৰীগৰাকী? ৰাষ্ট্ৰীয় ৰাজনীতিত তাৰ চৰ্চা চলিছে। ইডিয়ে অভিযোগ উত্থাপন কৰিছে যে যিটো অভিযোগত কেজৰিৱালক গ্ৰেপ্তাৰ কৰা হৈছে, সেই অভিযোগটো এনেধৰণৰ- আবকাৰী নীতিক কিছুমান ব্যক্তিগত কোম্পানীক ১২ শতাংশ পাইকাৰী ব্যৱসায়িক লাভ দিয়াৰ ষড়যন্ত্ৰৰ অংশ হিচাপে কাৰ্যকৰী কৰা হৈছিল যদিও মন্ত্ৰী গোটৰ বৈঠকৰ কাৰ্য্যবিৱৰণীত এনে নিয়মৰ কথা উল্লেখ কৰা হোৱা নাছিল। কেন্দ্ৰীয় সংস্থাটোৱে লগতে দাবী কৰিছে যে পাইকাৰী বিক্ৰেতাক অসাধাৰণ লাভৰ হাৰ দিবলৈ বিজয় নায়াৰ আৰু অন্যান্য ব্যক্তিৰ সমন্বয়ত দক্ষিণ গ্ৰুপৰ সৈতে এক ষড়যন্ত্ৰ কৰা হৈছিল। সংস্থাটোৱে জনোৱা মতে, মুখ্যমন্ত্ৰী অৰবিন্দ কেজৰিৱাল আৰু মনীষ ছিছ’দিয়াৰ হৈ নায়াৰে কাম কৰিছিল।