ৰেগিঙৰ দুৰ্বিষহ জ্বালা! মৃত্যুমুখলৈ ঠেলিলে মেডিকেলৰ ছাত্ৰক

ডিজিটেল ডেস্কঃ ৰেগিঙৰ জ্বালা বৰ দুৰ্বিষহ। শিক্ষানুষ্ঠানসমূহত ৰেগিং কঠোৰভাৱে নিষিদ্ধ যদিও আজিও বহু শিক্ষানুষ্ঠানত ৰেগিং কাণ্ড অব্যাহত আছে৷ ৰেগিং ছাত্ৰ সমাজৰ বাবে মহাব্যাধি স্বৰূপ। শিক্ষানুষ্ঠানত ছাত্ৰ-ছাত্ৰীয়ে মানৱীয় গুণ, সংস্কাৰ, শালীনতাবোধৰ পাঠ গ্ৰহণ কৰিবলৈ আহে৷ কিন্তু তেনে বহু ছাত্ৰ-ছাত্ৰীয়ে শালীনতা পাহৰি লিপ্ত হয় নিৰ্যাতনকাৰী কাণ্ডত। জ্যেষ্ঠসকলে কনিষ্ঠসকলক মৰম, আদৰ পাঠ শিকোৱাৰ সলনি শিকায় কেনেকৈ অত্যাচাৰী হ'ব পাৰি।

কেৱল মেধাৱী হলেই নহ'ব, থাকিব লাগিব মানৱীয়সম্পন্ন গুণ। নিজ সন্তানক সম্পদৰূপে গঢ় দিবলৈ পিতৃ-মাতৃয়ে অলেখ সপোন লৈ একো একোখন শিক্ষানুষ্ঠানলৈ প্ৰেৰণ কৰে৷ কিন্তু এই সপোন আধাতে সামৰি বহু ছাত্ৰ-ছাত্ৰী ঘৰলৈ উভতি আহিব লগা হয়, আত্মহত্যা কৰিব লগা হয়৷ তাৰ কাৰণ হল ৰেগিং৷ ৰেগিঙৰ বিৰুদ্ধে বহু সজাগতা আনিলেও মহাবিদ্যালয়, বিশ্ববিদ্যালয় আদিত আজিও ৰেগিঙৰ সন্মুখীন হয় বহু ছাত্ৰ ছাত্ৰী আৰু শেষত ৰেগিঙত অতিষ্ঠ হৈ বাচি লয় নিজকে শেষ কৰি দিয়াৰ চূড়ান্ত সিদ্ধান্ত। শেহতীয়াকৈ এজন ছাত্ৰই ৰেগিঙৰ আতিশয্য সহ্য কৰিব নোৱাৰি আত্মহত্যা কৰিবলৈ চেষ্টা চলায়।

এই ঘটনা সংঘটিত হৈছে তামিলনাডুৰ এখন চৰকাৰী চিকিৎসা মহাবিদ্যালয়ত। ছিনিয়ৰ ছাত্ৰৰ ৰেগিঙত অতিষ্ঠ হৈ আত্মহত্যাৰ কৰাৰ সিদ্ধান্ত লয় এগৰাকী ছাত্ৰই। কিন্তু কোনোমতে অচেতন অৱস্থাত ছাত্ৰগৰাকীক উদ্ধাৰ কৰি হাস্পতালত ভৰ্তি কৰোৱা হয়। বৰ্তমানে জীৱন মৃত্যুৰে হাস্পতালৰ আই চি ইউত যুঁজ দি আছে ছাত্ৰগৰাকীয়ে। তামিলনাডুৰ ধৰ্মপুৰী জিলাৰ চৰকাৰী চিকিৎসা মহাবিদ্যালয়ত সংঘটিত হৈছে এই অঘটন। চিকিৎসা মহাবিদ্যালয়খনৰ দ্বিতীয় বৰ্ষৰ সৰবনন নামৰ ছাত্ৰ গৰাকীয়ে ৰেগিঙত অতিষ্ঠ হৈ হাতৰ সিৰ কাটি দিছিল। কোঠাৰ ভিতৰত সংজ্ঞাহীন অৱস্থাত উদ্ধাৰ কৰি সতীৰ্থ ছাত্ৰই মহাবিদ্যালয়ৰ প্ৰশাসনক খবৰ দিয়াৰ লগতে আৰক্ষীকো ঘটনা সন্দৰ্ভত খবৰ দিয়ে। সৰবননকো ততাতৈয়াকৈ হাস্পতালত ভৰ্তি কৰোৱা হয়। ছাত্ৰজনৰ অৱস্থা বৰ্তমানেও সংকটজনক। আৰক্ষীয়ে ঘটনাৰ সন্দৰ্ভত তদন্ত আৰম্ভ কৰিছে।