নগালেণ্ড কাণ্ডক লৈ উত্তাল দেশ: অনুষ্ঠিত জৰুৰী কেবিনেট

ডিজিটেল ডেস্ক: নগালেণ্ডৰ গণহত্যাৰ চাঞ্চল্য এতিয়াও মাৰ যোৱা নাই৷ ৰাজ্যখনৰ শেহতীয়া পৰিস্থিতিক কেন্দ্ৰ কৰি উত্তাল হৈ আছে সমগ্ৰ দেশ৷ পুনৰ আফস্পা বাতিলৰ দাবী উঠিছে সৰ্বত্ৰ৷ এনে সময়তে আজি নগালেণ্ডত পুৱা দহ বজাত অনুষ্ঠিত হয় নগালেণ্ড চৰকাৰৰ জৰুৰী কেবিনেট বৈঠক৷ কেবিনেটে ৰাজ্যখনৰ পৰা ‘আফস্পা’ প্ৰত্যাহাৰৰ বাবে কেন্দ্ৰলৈ প্ৰস্তাৱ আগবঢ়োৱাৰ সিদ্ধান্ত গ্ৰহণ কৰে৷ লগতে নগালেণ্ডত চলি থকা ‘হৰ্ণবিল উৎসৱ’ৰ বাকী থকা সমূহ কাৰ্যসূচী কেবিনেটত বাতিল কৰা হৈছে৷

ঘটনা সংক্ৰান্তত কেন্দ্ৰীয় গৃহমন্ত্ৰী অমিত শ্বাহে সংসদত এক বিবৃতিযোগে ঘটনাটোৰ বাবে দুখ প্ৰকাশ কৰি পৰিচয় নজনাৰ বাবেহে তেনে ঘটনা সংঘটিত হ’ল বুলি মন্তব্য কৰিছিল৷ আকৌ, নগালেণ্ডৰ মুখ্যমন্ত্ৰী নেফিঅ’ ৰিঅ’ই কালি ৰাজ্যখনৰ পৰা ‘আফস্পা’ আইন বাতিল কৰিবই লাগিব বুলি মন্তব্য কৰিছিল৷ নগালেণ্ডৰ গুলীচালনাৰ ঘটনাত নিহতসকলৰ অন্ত্যেষ্টিক্ৰিয়াত বক্তব্য ৰাখি ‘আফস্পা’ আইনখনক দেশৰ ভাৱমূৰ্তিত ক’লা দাগ বুলি তেওঁ অভিহিত কৰিছিল৷ কালি মুখ্যমন্ত্ৰীৰ নেফিঅ’ ৰিঅ’ৰ বক্তব্য ইতিমধ্যে দেশজুৰি চৰ্চিত হৈছে৷ বিজেপিৰ সহযোগী আৰু এনডিএৰ অন্যতম অংশীদাৰ ৰিঅ’ৰ মন্তব্য তাৎপৰ্যপূৰ্ণ বুলি বিবেচিত হৈছে৷ মেঘালয়ৰ মুখ্যমন্ত্ৰী কনৰাড চাংমায়ো কালি ‘আফস্পা’ প্ৰত্যাহাৰৰ দাবী তোলে৷ ইতিমধ্যে, নগালেণ্ড আৰক্ষীয়ে সেনা গোটটোৰ বিৰুদ্ধে নিজাববীয়া গোচৰ ৰুজু কৰিছে৷