একালৰ বৃন্দাবন একালত পৰে চন; এদিনীয়া বিশ্বকাপৰ দৌৰৰ পৰা বাহিৰ হ’ল ৱেষ্ট ইণ্ডিজ

ৱেষ্ট ইণ্ডিজৰ ১৮১ ৰানৰ প্ৰতিক্ৰিয়া স্বৰূপে স্কটলেণ্ডে বেটিং কৰিবলৈ আহি ৪৩.৩ অভাৰত ৩ উইকেটত ১৮৫ ৰান সংগ্ৰহ কৰি মেচখনত জয়লাভ কৰে। একে সময়তে ৱেষ্ট ইণ্ডিজৰ দলটোৱে ২০২৩ চনৰ বিশ্বকাপলৈ যোগ্যতা অৰ্জনৰ পৰা বঞ্চিত হয়। স্কটলেণ্ডৰ হৈ মেথিউ ক্ৰছে সৰ্বাধিক ৰান সংগ্ৰহ কৰে। এই খেলুৱৈগৰাকীয়ে ১০৭টা বলত অপৰাজিত ৭৪ ৰান সংগ্ৰহ কৰে। তেওঁ নিজৰ ইনিংছত ৭টা চাৰিটা ৰান কৰে। আনহাতে ব্ৰেণ্ডন মেকমুলানে ১০৬ বলত ৬৯ ৰানৰ গুৰুত্বপূৰ্ণ ইনিংছ খেলিছিল। তেওঁ নিজৰ ইনিংছত ৮টা চাৰি আৰু ১টা ছয় কৰে। ।

টছত পৰাস্ত হোৱাৰ পিছত ৱেষ্ট ইণ্ডিজৰ হৈ সৰ্বাধিক ৰান সংগ্ৰহ কৰে জেছন হোল্ডাৰে। প্ৰাক্তন অধিনায়কগৰাকীয়ে ৭৯টা বলত ৪৫ ৰানৰ ইনিংছৰ খেল প্ৰদৰ্শিত কৰে। তেওঁ নিজৰ ইনিংছত ৩টা চাৰি আৰু ১টা ছয় কৰে। অৱশ্যে ইয়াৰ বাহিৰেও ৱেষ্ট ইণ্ডিজৰ বাকী বেটছমেনসকলে সকলো ক্ৰিকেটপ্ৰেমীকে নিৰাশ কৰে। ৱেষ্ট ইণ্ডিজৰ ৫ জন বেটছমেনে ডাবল ফিগাৰ ৰাণো সংগ্ৰহ কৰাত ব্যৰ্থ হয়। স্কটলেণ্ডৰ হৈ ব্ৰেণ্ডন মেকমুলানে সৰ্বাধিক ৩টা উইকেট দখল কৰে। আনহাতে ইয়াৰ বাহিৰেও ক্ৰীছ ছ’ল, মাৰ্ক ৱাট আৰু ক্ৰীছ গ্ৰীভছে ২-২ উইকেট দখল কৰে। আনহাতে ছফিয়ান শ্বৰীফে নিজৰ নামত ১ উইকেট দখল কৰে। তাৎপৰ্যপূৰ্ণভাৱে ভাৰতৰ মাটিত আয়োজন কৰা হৈছে এইবাৰৰ বিশ্বকাপ ২০২৩। ৫ অক্টোবৰৰ পৰা আৰম্ভ হ’বলগীয়া এই প্ৰতিযোগিতাখনৰ বিপৰীতে ১৯ নৱেম্বৰত অনুষ্ঠিত হ’ব এই খিতাপৰ চূড়ান্ত মেচ।