এনুৱেল ষ্টেটাছ অব্ এডুকেশ্যন ৰিপ’ৰ্টত শিক্ষাখণ্ডৰ অন্ধকাৰ দিশ; সমীক্ষাৰ পৰা বাহিৰত থাকি গ’ল মণিপুৰ

ডিজিটেল ডেস্ক: কেন্দ্ৰীয় চৰকাৰৰ অধীনস্থ সংস্থা প্ৰথম ফাউণ্ডেচনৰ নেতৃত্বত চলা এটা সমীক্ষাই দেশৰ গ্ৰামাঞ্চলৰ শিক্ষাখণ্ডৰ কিছু উদ্বেগজনক আৰু সামগ্ৰিকভাৱে হতাশজনক এখন ছবি তুলি ধৰিছে৷ এই জৰীপৰ আধাৰত ১৭ জানুৱাৰীত প্ৰকাশ পাইছে এনুৱেল ষ্টেটাছ অব্ এডুকেশ্যন ৰিপ’ৰ্ট৷ দেশখনত শিক্ষানুষ্ঠানসমূহত ১৪-১৮ বছৰ বয়সৰ ৮৬.৮ শতাংশৰো অধিক কিশোৰ-কিশোৰীয়ে অধ্যয়ন কৰে যদিও তেওঁলোকৰ ভিতৰত এক চতুৰ্থাংশই (২৫%) দ্বিতীয় শ্ৰেণীৰ পৰ্যায়ৰ পাঠেই তেওঁলোকৰ আঞ্চলিক ভাষাত সাৱলীলভাৱে পঢ়িব নোৱাৰে৷ এই বছৰ এনুৱেল এডুকেশ্যন ষ্টেটাচ ৰিপ’ৰ্টে ১৪-১৮  বছৰীয়া শিশু-কিশোৰক গুৰুত্ব দিছিল আৰু নামভৰ্তিৰ প্ৰকাৰ, শিকাৰ স্তৰ আৰু তেওঁলোকৰ আকাংক্ষাক মূল্যায়ন কৰিছিল৷

বিগত ১০ বছৰে দেশৰ সৰ্বাংগীন উন্নতি হোৱা বুলি কৈ আহিছে মোদী নেতৃত্বাধীন কেন্দ্ৰীয় চৰকাৰে৷ বিশেষকৈ দেশৰ শিক্ষাখণ্ডৰ উন্নতিৰ ক্ষেত্ৰত বিজেপি চৰকাৰখনে বিভিন্ন আঁচনি, শিক্ষানীতি প্ৰৱৰ্তনকে ধৰি কেতবোৰ কাৰ্যসূচীও হাতত লোৱা পৰিলক্ষিত হৈছে। কিন্তু বাস্তৱত হৈছে কি?

এএছই ৰিপ’ৰ্টে উদঙাইছে দেশৰ শিক্ষাখণ্ডৰ প্ৰকৃত স্বৰূপ৷ ৰাজ্য অনুযায়ী চলোৱা সমীক্ষাৰ ভিতৰত অসমত দেখা গৈছে উদ্বেগজনক ছবি‍৷ অসমত মাত্ৰ ৫২.৫% ছাত্ৰইহে ইংৰাজী পঢ়িব জানে ইংৰাজী৷ আনহাতে, ৭.৭% ল‘ৰা-ছোৱালীয়ে বিদ্যালয়ৰ পদূলিয়ে দেখা নাই৷ মাত্ৰ ১৯% শিক্ষাৰ্থীয়েহে জানে সাধাৰণ গণিত৷ অকল অসমেই নহয়, উত্তৰ প্ৰদেশৰ ৪৪% শিক্ষাৰ্থীয়ে ভালদৰে ক’ব নোৱাৰে ইংৰাজী৷ ৰাজ্যখনৰ ১৮.৩% ল’ৰা-ছোৱালীয়ে দেখা নাই বিদ্যালয়ৰ পদূলি৷ ৪৭% ছাত্ৰই নাজানে সাধাৰণ গণিত৷ একেদৰে, গুজৰাটৰ ৩৫% ছাত্ৰই ভালদৰে ক’ব নোৱাৰে ইংৰাজী৷ গুজৰাটৰ ২২.৭% ল’ৰা-ছোৱালীয়ে দেখা নাই বিদ্যালয়৷ মোদী-শ্বাহৰ ৰাজ্যৰ গুজৰাটৰ ৫২% শিক্ষাৰ্থীয়ে নাজানে সাধাৰণ গণিত৷ উল্লেখযোগ্য যে এই সমীক্ষাৰ বাবে বাছি লোৱা হৈছিল দেশৰ ২৬খন ৰাজ্যৰ ২৮খন জিলাৰ ১৪ৰ পৰা ১৮বছৰ বয়সৰ ৩৪,৭৪৫গৰাকী শিক্ষাৰ্থীক।

কিন্তু, ৰহস্যজনক কাৰণত এই সমীক্ষাৰ পৰা বাহিৰত থাকি গ’ল বিজেপিশাসিত মণিপুৰ৷ গোষ্ঠী সংঘৰ্ষই জুৰুলা কৰা মণিপুৰৰ শিক্ষাৰ ছবিখন দেখাৰ পৰা বঞ্চিত হৈ ৰ’ল দেশবাসী৷ কি কাৰণত প্ৰথম ফাউণ্ডেচনে ৰাজ্যখনত সমীক্ষা নচলালে, তাক লৈ উঠিছে প্ৰশ্ন৷ অৱশ্য, ২০২২ত মণিপুৰতো চলিছিল এই জৰীপ৷ সেই সময়ত মণিপুৰৰ নখন জিলা, ২৬২খন গাঁও  আৰু ৪,৮৫৯টা পৰিয়ালত সমীক্ষা চলোৱা হৈছিল। জৰীপটোৱে আলোকপাত কৰিছিল যে মণিপুৰত উত্তৰ-পূবৰ ৰাজ্যসমূহৰ ভিতৰত চৰকাৰী বিদ্যালয়ৰ নামভৰ্তিৰ শতাংশ আটাইতকৈ কম। ইয়াৰ উপৰি ২০২২ত প্ৰথমবাৰৰ বাবে বিদ্যালয়ত নামভৰ্তি নকৰা শিশুৰ হাৰ ২ শতাংশ বা তাতকৈ কম বুলি প্ৰকাশ পাইছিল৷ আনকি মহামাৰীৰ সময়ছোৱাত দীঘলীয়া সময়ৰ বাবে বিদ্যালয় বন্ধ হোৱাৰ পাছতো ২০১৮ৰ পৰা ২০২২ চনৰ ভিতৰত বিদ্যালয়ত নামভৰ্তি নকৰা শিশুৰ অনুপাত হ্ৰাস হৈ আহিছিল।