ডিজিটেল ডেস্কঃঅভিনেত্ৰী দীপিকা পাডুকনে আকৌ এবাৰ বিদেশত দেশৰ মুখ উজলাব ৷ অভিনেত্ৰীগৰাকীক এইবাৰ অস্কাৰৰ মঞ্চৰ পৰা আমন্ত্ৰণ জনোৱা হৈছে৷ বৃহস্পতিবাৰে নিশা ২০২৩ চনৰ অস্কাৰ বঁটা বিতৰকসকলৰ নাম প্ৰকাশ কৰা হৈছিল। দীপিকা সেই তালিকাৰ একমাত্ৰ ভাৰতীয় হিচাপে স্থান লাভ কৰিছে৷ উল্লেখ্য দীপিকাক কেৱল এবাৰহে হলীউডৰ এখন চলচ্চিত্ৰত দেখা গৈছিল। অৱশ্যে বিশ্বজুৰি দীপিকাৰ উপস্থিতি সদায় উজ্জ্বল হৈ আহিছে।
তেওঁ কেইমাহমান আগতে ফিফা বিশ্বকাপ ট্ৰফী উদ্বোধন কৰা প্ৰথম ভাৰতীয় আছিল। এইবাৰ দীপিকাই অস্কাৰৰ বঁটা বিতৰণ কৰাৰ গুৰু দায়িত্ব লাভ কৰিছে৷ ৯৫ সংখ্যক একাডেমী বঁটা ১২ মাৰ্চত ঘোষণা কৰা হ'ব। অনুষ্ঠানটো ১৩ মাৰ্চত সন্ধিয়া ৫:৩০ বজাত ভাৰতত সম্প্ৰচাৰিত হ'ব। মনোনীত চলচ্চিত্ৰ আৰু সেই ছবিসমূহৰ কলাকুশলীসকলক পুৰস্কৃত কৰিবলৈ দেশ-বিদেশৰ তাৰকাসকল অস্কাৰৰ মঞ্চত উপস্থিত থাকিব। এমিলি ব্লাণ্ট, চেমুৱেল এল জেকচন, ডোৱেন জনছন, মাইকেল জৰ্ডান আদিৰ সৈতে দীপিকাৰ নাম তাত জিলিকি উঠিছে। অভিনেত্ৰীগৰাকীয়ে তালিকাখন সামাজিক মাধ্যমত শ্বেয়াৰ কৰিছে। তাৰ পিছতে শুভেচ্ছাৰ বন্যা হৈছে।
উল্লেখ্য অস্কাৰৰ বঁটা বিতৰণৰ দায়িত্ব লাভ কৰাসকলৰ ভিতৰত দীপিকাই প্ৰথম ভাৰতীয় নহয়৷ ইয়াৰ আগতে প্ৰিয়ংকা চোপ্ৰা ২০২২ চনত অস্কাৰ বঁটা বিতৰণ অনুষ্ঠানত উপস্থিত থকাৰ সুযোগ লাভ কৰিছিল৷ অৱশ্যে, এই বছৰ অস্কাৰত ভাৰতৰ বাবে যথেষ্ট গুৰুত্বপূৰ্ণ । অস্কাৰৰ দৌৰত দেশৰ তিনিখন চলচ্চিত্ৰ আগবাঢ়ি আছে।
এছ এছ ৰাজামৌলীৰ 'আৰআৰআৰ'ৰ 'নাটু নাটু' গানটো শ্ৰেষ্ঠ মূল গীতৰ শ্ৰেণীত মনোনীত হৈছে। ইয়াৰ উপৰি মনোনয়নৰ তালিকাত দুখন ভাৰতীয় তথ্যচিত্ৰও আছে। এখন হৈছে সৌনক সেনৰ দ্বাৰা পৰিচালিত 'অল দ্যাট ব্ৰিডছ' আৰু আনখন হৈছে কাৰ্তিকি গনচালভেছৰ দ্বাৰা পৰিচালিত চুটি ছবি 'দ্য এলিফেন্ট হুইচপাৰচ'। এনে সময়তে দীপিকা অনুষ্ঠানটোৰ অন্য এক আকৰ্ষণ হৈ পৰিছে।
Continue Reading
