ডিজিটেল ডেস্কঃ গছপুলি ৰোপণৰ নামত বন বিভাগৰ প্ৰহসনৰ ছবি পোহৰলৈ আহিছে। সংৰক্ষিত বনাঞ্চল সেউজীয়া কৰাৰ লক্ষ্যৰে তিনিচুকীয়া জিলাৰ ডুমডুমা বন সংমণ্ডলৰ অন্তৰ্গত ডুমডুমা বনাঞ্চলিক কাৰ্যালয়ৰ অধীনৰ দুৱাৰমৰা সংৰক্ষিত বনাঞ্চলৰ ২ নং নলনি দিশত ২০২৩-২৪ বৰ্ষত প্ৰায় ২০ লাখ টকা ব্যয় সাপেক্ষে CAMPA আঁচনিৰ অধীনত অসমৰ ৰাজ্যিক গছ হোলোং গছ ৰোপণ কৰা হৈছিল।
বনাঞ্চলখনৰ প্ৰায় পাঁচ হেক্টৰ ভূমিত 'Hollong Plantation' নামেৰে অসমৰ জাতীয় হোলোং গছ ৰোপণ কৰিছিল বন বিভাগে। কিন্তু, বৰ্তমান সময়ত বনাঞ্চলখনত দেখিবলৈ পোৱা নাই বন বিভাগে ৰোপণ কৰা হোলোং পুলিসমূহ।
অভিযোগ অনুহৰি, বন বিভাগে অৰ্দ্ধমৃত হোলোং গছৰ পুলি এই বনাঞ্চলখনৰ ভিতৰত ৰোপণ কৰাৰ ফলতেই বৰ্তমান সময়ত প্ৰায় ৯৫% গছপুলি নোহোৱা হৈছে বা গছপুলি সমূহ নষ্ট হৈছে। বন বিভাগৰ গাফিলতিৰ ফলতেই চৰকাৰী ধনৰ অপচয় হোৱা বুলিও স্থানীয় ৰাইজে অভিযোগ কৰিছে।
অন্যহাতে, বন বিভাগে গছপুলি ৰোপণ কৰা দিনৰে পৰা গছপুলি সমূহ উপযুক্ত চোৱাচিতাৰ কোনো ব্যৱস্থা গ্ৰহণ নকৰিলে বুলি ৰাইজে অভিযোগ কৰিছে। বনাঞ্চলখনত পুনৰ গছপুলি ৰোপণ কৰি চোৱাচিতাৰ বাবে কৰ্মী নিয়োগ কৰিবলৈ স্থানীয় লোকসকলে চৰকাৰ তথা বন বিভাগক দাবী জনাইছে ।
Continue Reading
