উত্তম গগৈক হত্যা কৰি পত্নী বৰ্তমান ন্যায়িক জিম্মাত,কন্যা জুভেনাইল হোমত! পুত্ৰৰ জন্মদিন পাতিলে ওচৰ-চুবুৰীয়াই

ডিজিটেল ডেস্কঃ এপষেক আগতে, অবোধ শিশুটিৰ জীৱন একেবাৰে সলনি হৈ গ’ল। নিজ মাতৃ আৰু বায়েকে অতি নিষ্ঠুৰভাবে হত্যা কৰিলে পিতৃক। ঘাতক মাতৃ বৰ্তমান ন্যায়িক জিন্মাত, বায়েক যোৰহাটৰ শিশু গৃহত (Juvenile Home)।

উল্লেখ্য যে ২৫ জুলাইত ডিব্ৰুগড় বৰবৰুৱাৰ ব্যৱসায়ী উত্তম গগৈক পত্নী ববী সোণোৱাল গগৈ আৰু নৱম শ্ৰেণীত অধ্যয়নৰত কন্যাই চুপাৰী কিলাৰ লগাই অতি নৃশংসভাৱে হত্যা কৰিছিল। ষষ্ঠ শ্ৰেণীত অধ্যয়নৰত এই শিশুটিৰ কাষত এতিয়া আপোন বুলিবলৈ যেন কোনো নাই।

দেওবাৰ আছিল তাৰবাবে বিশেষ দিন, তাৰ জন্মদিন। ১২ বছৰত ভৰি থলে সি। কিন্তু কেক আনিবলৈ পিতৃ নাই, মৰমৰে আলিংগন কৰিবলৈ নিজ মাতৃ কাষত নাই, উপহাৰ দিবলৈয়ো বায়েক নাই।

ডিব্ৰুগড়ৰ বৰবৰুৱা লাহন গাঁৱৰ ৰাইজৰ ব্যতিক্ৰমী চিন্তা! এক প্ৰশংসনীয় প্ৰচেষ্টা। ৰাইজে পাতিলে শিশুটিৰ জন্মদিন। বেলুনেৰে সজাই তুলিলে ঘৰ, আনিলে কেক, নিমন্ত্ৰণ কৰিলে লগৰ সমনীয়াক। যন্ত্ৰণাৰ মাজতো এই ক্ষণ উপভোগ কৰি অপাৰ আনন্দ লভিলে শিশুটিয়ে। দুখ, হতাশা আৰু তীব্ৰ মানসিক চাপৰ মাজতো ৰাইজে আয়োজন কৰা এনে Surprise Partyত এচমকা আশাৰ কিৰণ, এটি অকৃত্ৰিম হাঁহি বিৰিঙি উঠিল শিশুটিৰ গালে-মুখত।

সিটো অপৰাধ কৰা নাই, সন্মান আৰু মৰ্যদা সহকাৰে সি সমাজত জীয়াই থাকিব লাগিব। অপৰাধীৰ সন্তান বুলি তাক কোনেও তিৰস্কাৰ কৰিব নোৱাৰিব। সি মুক্তমনেৰে পঢ়া শুনা কৰিব পৰা এটা পৰিবেশ দিব বিছাৰে ৰাইজে। ভৱিষ্যতে উচ্চ শিক্ষাৰে শিক্ষিত হৈ এগৰাকী সু-নাগৰিক হিচাপে দেউতাকে এৰি থৈ যোৱা কোটি কোটি টকাৰ সা-সম্পত্তি আৰু ঘৰখনৰ দায়িত্ব ল'ব পাৰে তাকে তাৰ জন্মদিনত কামনা কৰিছে গাঁওবাসীয়ে।