ডিজিটেল ডেস্কঃ কেদাৰনাথ আৰু বদ্ৰীনাথ মন্দিৰত মোবাইল ফোনৰ ব্যৱহাৰ নিষিদ্ধ কৰা হৈছে।এতিয়াৰে পৰা সেই মন্দিৰত কোনো ছবি বা ভিডিঅ' ল'ব নোৱাৰিব। শেহতীয়াকৈ এগৰাকী যুৱতী ব্লগাৰে উত্তৰাখণ্ডৰ কেদাৰনাথ মন্দিৰৰ সন্মুখত তেওঁৰ প্ৰেমিকক প্ৰেমৰ প্ৰস্তাৱ দিছিল। সেই ভিডিঅ’ ভাইৰেল হৈ পৰাৰ পিছতে বিতৰ্কৰ সৃষ্টি হৈছিল।
মন্দিৰ কৰ্তৃপক্ষই এনে প্ৰতিক্ৰিয়াৰ পিছতে মন্দিৰত মোবাইল ফোন নিষিদ্ধ কৰাৰ সিদ্ধান্ত লয়।শ্ৰী বদ্ৰীনাথ-কেদাৰনাথ মন্দিৰ সমিতিয়ে মন্দিৰ চৌহদত কেইবাখনো বোৰ্ড স্থাপন কৰিছে। ইয়াত হিন্দী আৰু বাংলা ভাষাত মোবাইল ফোন নিষিদ্ধ কৰাৰ নিৰ্দেশনা দিয়া হৈছে। এনে জাননীত লিখা আছে "কোনেও মোবাইল ফোনলৈ মন্দিৰৰ চৌহদত প্ৰৱেশ কৰিব নোৱাৰিব। কোনো ছবি বা ভিডিঅ' ল'ব নোৱাৰিব। আপুনি চিচি কেমেৰাৰ নিৰীক্ষণত আছে। ''
মন্দিৰ কৰ্তৃপক্ষই দৰ্শনাৰ্থীসকলক 'শালীন' কাপোৰ পিন্ধিবলৈও নিৰ্দেশ দিছে। মন্দিৰৰ চৌহদত তাঁবু স্থাপন কৰিব নোৱাৰি বুলিও কোৱা হৈছে। কোনো লোকে যদি আদেশটো পালন নকৰে তেন্তে আইনী ব্যৱস্থা লোৱা হ'ব বুলিও সতৰ্ক কৰি দিয়া হৈছে। শ্ৰী বদ্ৰীনাথ-কেদাৰনাথ মন্দিৰ সমিতিৰ সভাপতি অজেন্দ্ৰ অজয়ে কয় যে ধৰ্মীয় স্থানত কিছুমান ৰীতি-নীতি আছে।সেইবোৰ সকলোৱে অনুসৰণ কৰিব লাগে। বদ্ৰীনাথৰ মন্দিৰতো একে ধৰণৰ বোৰ্ড স্থাপন কৰা হৈছে।
Continue Reading
