ডিজিটেল ডেস্কঃচীনৰ সেনাই লাডাখ সীমান্তত পুনৰাবৃত্তি ঘটাব পাৰে গালোৱান কাণ্ডৰ। আপাততঃ তেনে আশংকাই গা কৰি উঠিছে। জানিব পৰা মতে সীমান্তত নিয়োজিত চীনৰ সেনাই ক্ৰয় কৰিছে অতি মাৰাত্মক হিচাবে পৰিগণিত হ’ব পৰা কাঁইটীয়া গদা। আশংকা কৰা হৈছে যে প্ৰকৃত নিয়ন্ত্ৰণ ৰেখাত ভাৰতীয় সেনাৰ বিৰুদ্ধে চীনৰ সেনাই সেই অস্ত্ৰ ব্যৱহাৰ কৰিব পাৰে।
সৰ্বভাৰতীয় সংবাদ মাধ্যমৰ খবৰ অনুসৰি চীনা সেনাই ২০২০ চনত গালোৱান সংঘৰ্ষত ব্যৱহাৰ কৰা একে ধৰণৰ অস্ত্ৰই এতিয়া পুনৰ ক্ৰয় কৰি আছে। ফলস্বৰূপে প্ৰশ্ন উত্থাপিত হৈছে যে চীনৰ পিপলছ লিবাৰেচন আৰ্মীয়ে গোপনে গালোৱানৰ দৰে আক্ৰমণৰ পৰিকল্পনা কৰিছে নেকি? খবৰ অনুসৰি চীনৰ সেনাই ২,৬০০ টা কাঁইটীয়া গদা ক্ৰয় কৰিছে। সেই গদাৰ তিনিটা অংশ আছে। শীৰ্ষত তীখাৰ কাঁইটীয়া ফুল আছে, যিটো অংশই শত্ৰুক আঘাত সহজে ধৰাশয়ী কৰিব পাৰিব। । এই গদা ১.৮ মিটাৰ দীঘল।
২০২০ চনৰ ১৫ জুনত গালোৱান উপত্যকাত ভাৰত আৰু চীনা সৈন্যবাহিনী মুখামুখি সংঘৰ্ষত লিপ্ত হৈছিল। দুয়োফালৰ সৈন্যসকলে লোহাৰ ৰড আৰু কাঁইটীয়া তাঁৰৰ অস্ত্ৰৰে কেইবা ঘণ্টা ধৰি যুঁজ কৰিছিল। ৰক্তক্ষয়ী সংঘৰ্ষত ২০ জন ভাৰতীয় সৈনিক শ্বহীদ হৈছিল। ১৯৭৫ চনৰ পিছত সেয়া প্ৰথম বাৰৰ বাবে প্ৰকৃত নিয়ন্ত্ৰণ ৰেখাৰ কাষত হোৱা প্ৰাণ হানিৰ ঘটনা আছিল। সংঘৰ্ষৰ পিছত সীমান্তত যুদ্ধৰ পৰিস্থিতিৰ সৃষ্টি হৈছিল। পৰিস্থিতি শান্ত কৰিবলৈ দুয়োখন দেশৰ সৈন্যবাহিনী কেইবাবাৰো আলোচনাত মিলিত হৈছে। কিন্তু লাডাখত এতিয়াও শান্তিৰ পৰিবেশ উভতি অহা নাই।
Continue Reading
