ঘোৰ সমস্যা! মেট্ৰ' ষ্টেচনলৈ কোনে, কিয় আনিলে সোণালী বান্দৰ?

ডিজিটেল ডেস্কঃ অসমৰ ৰে'ল ষ্টেচনবোৰত সাধাৰণতে চোৰ, পকেটমাৰ বা প্ৰৱঞ্চকৰ অতপালিত হাৰাশাস্তি খাবলগীয়া হয় যাত্ৰীসকলে। কিন্তু লক্ষ্ণৌৰ পৰিৱেশ সুকীয়া। বান্দৰে অতিষ্ঠ কৰিছে লক্ষ্ণৌৰ জনসাধাৰণ তথা মেট্ৰ' কৰ্তৃপক্ষক।

লক্ষ্ণৌত মেট্ৰ'ত যাত্ৰা কৰিব ওলাইছে যদি সাৱধান হওক, আপোনাৰ মুখামুখি হ'ব পাৰে বান্দৰৰ সৈতে। শেহতীয়াকৈ বান্দৰৰ আতংকত হাবাথুৰি খাইছে সাধাৰণ লোকৰ লগতে মেট্ৰ' কৰ্তৃপক্ষও। বান্দৰৰ অতপালি ৰোধৰ উপায় বিচাৰি ফুৰিছে লক্ষ্ণৌ মেট্ৰ' কৰ্তৃপক্ষ। প্ৰথমতে মেট্ৰ' কৰ্তৃপক্ষই ষ্টেচনবোৰত সোণালী বান্দৰৰ খঙাল শব্দ বজাই বান্দৰ খেদাৰ পন্থা হাতত লৈছিল। ইয়াৰদ্বাৰা কিছু পৰিমাণে সকাহ পালেও ই দীৰ্ঘস্থায়ী সমাধান নহ'ল। অৱশেষত মেট্ৰ' কৰ্তৃপক্ষই বিচাৰি উলিয়ালে এক অভিনৱ সমাধানৰ পথ। এইবাৰ বান্দৰৰ লগত মোকাবিলা কৰিবলৈ আনিলে সোণালী বান্দৰ। চহৰখনৰ ৯ টাকৈ মেট্ৰ' ষ্টেচনত বহুওৱা হ'ল সোণালী বান্দৰৰ 'কাটআউট'।

ষ্টেচন নিয়ন্ত্ৰক বিবেক মিশ্রই জনায় যে, প্ৰথমতে বান্দৰ খেদিবলৈ 'খঙাল সোণালী বান্দৰ'ৰ শব্দ বজোৱা হৈছিল। ইয়াৰ দ্বাৰা কিছু সকাহ পোৱা গৈছিল যদিও ই দীৰ্ঘসময়লৈ প্ৰভাৱিত কৰিব নোৱাৰিলে আৰু সেইকাৰণেই 'কাটআউট ডিছপ্লে' কৰাৰ সিদ্ধান্ত ল'বলগীয়া হ'ল। আনকি সময়ে সময়ে 'কাটআউট'বোৰৰ স্থান পৰিৱৰ্তন কৰি থকা হয় বুলিও তেওঁ জনায়।

বান্দৰক ভেটাৰ লক্ষ্ণৌ মেট্ৰ' প্ৰশাসনৰ এই অভিনৱ কৌশল বেচ আমোদজনক হিচাপে বিবেচিত হৈছে। এফালে সোণালী বান্দৰৰ কাটআউট আৰু আনফালে খঙাল সোণালী বান্দৰৰ শব্দই মেট্ৰ' ষ্টেচনবোৰৰ যাত্ৰীক একপ্ৰকাৰ মনোৰঞ্জন দিছে।