গুৱাহাটী বিমানবন্দৰৰ পাছত এইবাৰ জয়পুৰ আন্তঃৰাষ্ট্ৰীয় বিমানবন্দৰ আদানীৰ হাতলৈ

ডিজিটেল ডেস্কঃ এইবাৰ ৰাজস্থানৰ জয়পুৰ আন্তঃৰাষ্ট্ৰীয় বিমানবন্দৰ গল আদানীৰ হাতলৈ৷ দেশৰ সকলো ৰাজহুৱা সম্পদ পুঁজিপতিৰ হাতত এটা এটাকৈ তুলি দিছে মোদী চৰকাৰে৷ গুৱাহাটী বিমানবন্দৰৰ দায়িত্ব লোৱাৰ দুদিন পিছত এতিয়া আদানি গ্ৰুপে দেওবাৰে নিশাৰ পৰা জয়পুৰ আন্তঃৰাষ্ট্ৰীয় বিমানবন্দৰৰ পৰিচালনা, ব্যৱস্থাপনা আৰু উন্নয়নৰ দায়িত্ব হাতত ল’বলৈ সাজু হৈছে।

জয়পুৰত এই কাৰ্যৰ তীব্ৰ বিৰোধিতা কৰিছিল বিভিন্ন সংগঠন আৰু ৰাজনৈতিক দলে৷ কিন্তু কেন্দ্ৰীয় কেবিনেটে সকলোকে আওকাণ কৰি আদানী গোটৰ হাতত পৰৱৰ্তী ৫০ বছৰৰ বাবে জয়পুৰ আন্তঃৰাষ্ট্ৰীয় বিমানবন্দৰ পৰিচালনা, বিকাশ আৰু ৰক্ষণাবেক্ষণৰ অধিকাৰত অনুমোদন জনাইছে।

উল্লেখ্য যে কেন্দ্ৰীয় কেবিনেটে ভাৰতীয় বিমান প্ৰাধিকৰণৰ জৰিয়তে বিশ্বজুৰি আয়োজন কৰা প্ৰতিযোগিতামূলক নিবিদাত সফল হোৱা মেচাৰ্চ আদানী এণ্টাৰপ্ৰাইজেছ লিমিটেডক ৫০ বছৰৰ বাবে তিনিটা বিমান বন্দৰ ক্ৰমে-জয়পুৰ, গুৱাহাটী আৰু থিৰুৱন্তপুৰম বন্দৰৰ পৰিচালনা, ব্যৱস্থাপনা আৰু উন্নয়নৰ বাবে লিজত দিয়াৰ প্ৰস্তাৱত স্বীকৃতি প্ৰদান কৰে৷