ডিজিটেল ডেস্কঃ শ্ৰীলংকাৰ বিৰুদ্ধে খেলিব লগা ভাৰতৰ এদিনীয়া শৃংখলাত কেইবাটাও অভিলেখৰ গৰাকী হ’বলৈ আগবাঢ়িছে বিৰাট কোহলী। ভংগ কৰিব পাৰে শচীন টেণ্ডুলকাৰৰ অভিলেখ।
ঘৰুৱা এদিনীয়া আন্তঃৰাষ্ট্ৰীয় ক্ৰিকেটত শচীনৰ শতকৰ সংখ্যা হৈছে 20। ঘৰুৱা পিটছত ১৬৪ খন এদিনীয়া খেল খেলিছিল শচীনে। তেওঁৰ এই বিশ্ব অভিলেখ ভংগ কৰিবলৈ বিৰাটক প্ৰয়োজন মাত্ৰ মাত্ৰ এটা শতক। এতিয়ালৈকে কোহলীয়ে ঘৰুৱা পিটছত ১০১ খন এদিনীয়া আন্তঃৰাষ্ট্ৰীয় মেচ খেলিছে। শতক অৰ্জন কৰিছে ১৯ টা।
শচীনৰ আন এটা অভিলেখ অতিক্ৰমৰো সুযোগ আছে বিৰাটৰ। ভাৰত আৰু শ্ৰীলংকাৰ মাজত অনুষ্ঠিত এদিনীয়া খেলত শচীন আৰু কোহলীয়ে এতিয়া যুটীয়াভাৱে সৰ্বাধিক শতক অৰ্জন কৰাৰ কৃতিত্ব লাভ কৰিছে। শ্ৰীলংকাৰ বিৰুদ্ধে ৮৪ খন এদিনীয়া খেলত শচীনে আঠটা শতক অৰ্জন কৰে। কোহলীৰো শতকৰ সংখ্যা একে। তেওঁ এতিয়ালৈকে ৪৭ খন খেল খেলিছে। অৰ্থাৎ এই ক্ষেত্ৰত শচীনক অতিক্ৰম কৰিবলৈ কোহলীক আৰু এটা শতকৰ প্ৰয়োজন।
এদিনীয়া আন্তঃৰাষ্ট্ৰীয় ক্ৰিকেটত কোহলীয়ে আৰু ১৮০ ৰাণ সংগ্ৰহ কৰিলে আন এটা অভিলেখত উপনীত হ’ব। সেয়া হৈছে এদিনীয়া ক্ৰিকেটৰ ইতিহাসত সৰ্বাধিক ৰাণ সংগ্ৰহকাৰীৰ তালিকাত শীৰ্ষ পাঁচৰ ভিতৰত অন্তৰ্ভূক্ত হোৱা। এতিয়ালৈকে, কোহলীয়ে ২৬৫ খন এদিনীয়া মেচত ১২,৪৭১ ৰাণ সংগ্ৰহ কৰিছে। পঞ্চম স্থানত শ্ৰীলংকাৰ প্ৰাক্তন অধিনায়ক মাহেলা জয়বৰ্ধনে ৪৪৮ খন মেচ খেলি ১২,৬৫০ ৰাণ সংগ্ৰহ কৰে। শচীন এই তালিকাৰ শীৰ্ষত আছে। তেওঁ ৪৬৩ খন খেল খেলিছিল আৰু ১৮,৪২৬ ৰাণ সংগ্ৰহ কৰিছিল।
Continue Reading
