ডিজিটেল ডেস্ক: বিজেপিশাসিত গুজৰাটত ক্ৰমাৎ বৃদ্ধি পাইছে আত্মহত্যাৰ হাৰ৷ বৰ্ধিত নিবনুৱা সমস্যায়ো ভয়ংকৰ ৰূপ ধাৰণ কৰিছে মোদী-শ্বাহৰ গৃহ ৰাজ্যখনত৷ নিৰ্বাচনৰ পূৰ্বে ৰাজ্যখনৰ আত্মহত্যা আৰু নিবনুৱা সমস্যাক লৈ উদ্বিগ্নতা প্ৰকাশ কৰিছে ভাৰতীয় জাতীয় কংগ্ৰেছে৷
কংগ্ৰেছ অধ্যক্ষ মল্লিকাৰ্জুন খৰ্গেই শুকুৰবাৰে বিজেপিশাসিত ৰাজ্যখনত আত্মহত্যাৰ বৰ্ধিত হাৰক লৈ কেন্দ্ৰ আৰু গুজৰাট চৰকাৰক লক্ষ্য কৰি লয় আৰু অভিযোগ কৰি কয় যে তেওঁলোকে যুৱক-যুৱতীসকলৰ বাবে নতুন চাকৰিৰ সুযোগ সৃষ্টি কৰাৰ প্ৰতিশ্ৰুতি পূৰণত ব্যৰ্থ হৈছে।
তেওঁ এইটোও কৈছিল যে গৃহৰাজ্যৰ এই গুৰুতৰ মানৱীয় ঘটনাৰ ওপৰত প্ৰধানমন্ত্ৰীগৰাকীৰ মৌনতা ৰহস্যজনক৷ তেওঁ গুজৰাট চৰকাৰক নাগৰিকসকলৰ কল্যাণ আৰু সুৰক্ষাক প্ৰাধান্য দিবলৈ আৰু ৰাজ্যখনৰ ওপৰত ক’লা ছাঁ পেলোৱা সমস্যাটোৰ সমাধানৰ বাবে পদক্ষেপ ল’বলৈ আহ্বান জনায়।
এক বিবৃতিত খৰ্গেই কয়, গভীৰ উদ্বেগ আৰু গভীৰ হতাশাৰ সৈতে মই গুজৰাট চৰকাৰে আত্মহত্যাৰ হাৰ সন্দৰ্ভত পোহৰলৈ অনা দুখজনক খবৰত ব্যথিত হৈছোঁ৷
কংগ্ৰেছ ৰ মুৰব্বীগৰাকীয়ে কয় যে ৰাজ্যিক বিধানসভাত উপস্থাপন কৰা শেহতীয়া তথ্যই সূচায় যে বিজেপি চৰকাৰৰ শাসনত যোৱা তিনিটা বিত্তীয় বৰ্ষত ২৫,০০০তকৈও অধিক লোকে আত্মহত্যাৰ ফলত প্ৰাণ হেৰুৱাইছে, যাৰ ভিতৰত প্ৰায় ৫০০গৰাকী ছাত্ৰ আছিল।
তেওঁ কয় যে পৰিসংখ্যাই হতাশা, নিৰাশা আৰু সমাধান নোহোৱা অভিযোগৰ সৈতে যুঁজি থকা জনসাধাৰণৰ এক ভয়ংকৰ ছবি অংকন কৰিছে। প্ৰগতি আৰু সমৃদ্ধিৰ গৌৰৱ কৰা এখন ৰাজ্যত ইমানসংখ্যক নাগৰিকে নিজৰ জীৱন ল'বলৈ বাধ্য হোৱাটো অতি দুৰ্ভাগ্যজনক৷
এয়া বিজেপিৰ ডাবল ইঞ্জিনৰ অপশাসনৰ আন এক উদাহৰণ বুলি মন্তব্য কৰে খৰ্গেই৷ তেওঁ লগতে কয়, গুজৰাট চৰকাৰ আৰু কেন্দ্ৰীয় চৰকাৰে চাকৰিৰ খালী পদ মুকলি আৰু পূৰণ কৰা আৰু নতুন চাকৰিৰ সুযোগ সৃষ্টি কৰাৰ প্ৰতিশ্ৰুতি পূৰণতো ব্যৰ্থ হৈছে৷
Continue Reading
