গুজৰাটত ভয়াৱহ দুৰ্ঘটনাঃ আকস্মিকতে ভাঙি পৰিল দলং, মৃত্যু হৈছে কমেও ৪০গৰাকী লোক

ডিজিটেল ডেস্কঃ প্ৰধানমন্ত্ৰী নৰেন্দ্ৰ মোদী দেওবাৰে গৃহৰাজ্য গুজৰাট ভ্ৰমণত আছে। আগন্তুক বিধানসভা নিৰ্বাচন উপলক্ষেই মোদীয়ে গৃহৰাজ্যৰ ৰাজনৈতিক পৰিৱেশ বুজ লৈ আছে। প্ৰধানমন্ত্ৰী গুজৰাটত থকা অৱস্থাতে ৰাজ্যখনত সংঘটিত হৈছে এক ভয়ংকৰ ঘটনা।

ৰাজ্যখনৰ মোৰবি জিলাৰ মাচ্চু নদীত থকা এখন জুলনা দলং ভাঙি পৰাত মৃত্যু হৈছে প্ৰায় ৪০ গৰাকী লোকৰ। ইয়াৰ উপৰি গুৰুত্তৰভাৱে আঘাটপ্ৰাপ্ত অৱস্থাত বহু লোকক হস্পিতালত ভৰ্তি কৰোৱা হৈছে।

ইতিমধ্যে ভয়াৱহ দুৰ্ঘটনাটোৰ ভিডিঅ’সমূহ ভাইৰেল হৈ পৰিছে। দেখা গৈছে যে জুলনা দলং ভাঙি যোৱাত দলঙত থকা সকলো লোক নদীত পৰি যায়।

বহুতো লোকে নদীখন সাঁতুৰি পাৰলৈ অহাৰ চেষ্টা কৰে। কিছুৱে ভগ্ন দলঙৰ ৰেলিঙত ধৰি প্ৰাণ বচোৱাৰ চেষ্টা কৰে।

স্থানীয় বাসিন্দাসকলে প্ৰথমে উদ্ধাৰকাৰ্য চলোৱাৰ পাছতে দুৰ্যোগ ব্যৱস্থাপনা বাহিনী আৰু আৰক্ষী ঘটনাস্থলীত উপস্থিত হয়। বৰ্তমানেও উদ্ধাৰকাৰ্য চলি আছে। ইতিমধ্যে গুজৰাটৰ মুখ্যমন্ত্ৰী ভূপেন্দ্ৰ পেটেলৰ স’তে প্ৰধানমন্ত্ৰী নৰেন্দ্ৰ মোদীয়ে ঘটনাটোৰ সংক্ৰান্তত আলোচনা কৰিছে বুলি জানিব পৰা গৈছে।