ডিজিটেল ডেস্কঃ প্ৰধানমন্ত্ৰী নৰেন্দ্ৰ মোদীৰ মাতৃ হীৰাবেন মোদী গুৰুতৰভাৱে অসুস্থ হৈ পৰিছে৷ পৰিয়ালৰ লোকে তেওঁক ততাতৈয়াকৈ চিকিৎসালয়ত ভৰ্তি কৰিছে। সূত্ৰ অনুসৰি তেওঁ বৃদ্ধ বয়সৰ সমস্যাত ভুগি আছে। মঙলবাৰে নিশা তেওঁৰ শাৰীৰিক অৱস্থাৰ হঠাতে অৱনতি ঘটিছিল। তেওঁক বুধবাৰে আহমেদাবাদৰ ইউ এন মেহতা চিকিৎসালয়ত ভৰ্তি কৰোৱা হয়। অৱশ্যে, শেহতীয়া প্ৰতিবেদন অনুসৰি, তেওঁৰ শাৰীৰিক অৱস্থা স্থিৰ। চিন্তাৰ কোনো কাৰণ নাই।
প্ৰধানমন্ত্ৰীৰ মাতৃ হীৰাবেন মোদীয়ে এই বছৰ ১০০ বছৰ বয়স সম্পূৰ্ণ কৰিছে। স্বাভাৱিকতে তেওঁৰ শৰীৰত বিভিন্ন প্ৰকাৰৰ ৰোগে বাহ বান্ধিছে । পৰিয়ালৰ সূত্ৰই প্ৰকাশ কৰা অনুসৰি হীৰাবেন মোদীৰ চিন্তাৰ কোনো কাৰণ নাই। আগতেও তেওঁক এনে ধৰণে কেইবাবাৰো চিকিৎসালয়ত ভৰ্তি কৰিব লগা হৈছিল।
প্ৰধানমন্ত্ৰীৰ পৰিয়ালৰ বাবে হয়তো এতিয়াৰ সময়টো ভাল নহয়। প্ৰধানমন্ত্ৰী নৰেন্দ্ৰ মোদীৰ ভাতৃ প্ৰহ্লাদ মোদী আৰু তেওঁৰ গোটেই পৰিয়ালটো দুৰ্ঘটনাত পতিত হোৱাৰ পিছত তেওঁলোকক মঙলবাৰে চিকিৎসালয়ত ভৰ্তি কৰোৱা হৈছিল। মঙলবাৰে আবেলি, প্ৰহ্লাদ মোদীয়ে মাৰ্চিডিজ বেঞ্জ বাহনেৰে পৰিয়ালৰ সৈতে বান্দিপুৰালৈ যাওঁতে দুৰ্ঘটনাত পতিত হয়।
এই দুৰ্ঘটনাত মোদীৰ ভাতৃ আঘাতপ্ৰাপ্ত হৈছিল। ঘটনাটোৰ সময়ত তেওঁৰ পত্নী, পুত্ৰ, পুত্ৰৰ পত্নী আৰু নাতি গাড়ীখনতে আছিল। খবৰ অনুসৰি তেওঁলোক আটাইকেইজন আহত হৈছিল। দুৰ্ঘটনাটোৰ কেই ঘণ্টামানৰ পিছতে প্ৰধানমন্ত্ৰীৰ মাতৃক চিকিৎসালয়ত ভৰ্তি কৰিব লগা হৈছে।
গুজৰাট বিধানসভাৰ নিৰ্বাচনৰ সময়ত শেষবাৰৰ বাবে প্ৰধানমন্ত্ৰীয়ে তেওঁৰ মাতৃক লগ কৰিবলৈ গৈছিল । প্ৰধানমন্ত্ৰীয়ে ভোট দানৰ সময়ত তেওঁৰ মাতৃৰ সৈতে কিছু সময় অতিবাহিত কৰিছিল। মোদীয়ে আজিয়েই তেওঁৰ অসুস্থ মাতৃক সাক্ষাৎ কৰিব নে নাই সেয়া এতিয়াও জানিব পৰা হোৱা নাই৷
Continue Reading
