ডিজিটেল ডেস্কঃ ‘ইমাৰ্জেন্সী’ নামৰ চলচ্চিত্ৰখনৰ দৃশ্যগ্ৰহণ সমাপ্ত কৰিছে কংগনা ৰাণাৱটে। 'মণিকৰ্ণিকা: দ্য কুইন অফ ঝাঁচী'ৰ পিছত কংগনা ৰাণাৱটে পুনৰ পৰিচালক হিচাপে অৱতীৰ্ণ হৈছে। কংগনাৰ প্ৰযোজনা প্ৰতিষ্ঠান 'মণিকৰ্ণিকা ফিল্মছ’-এ ছবিখন প্ৰযোজনা কৰিছে।
চলচ্চিত্ৰখনৰ দৃশ্যগ্ৰহণ শেষ হোৱাৰ পিছত, 'কুইন' খ্যাত অভিনেত্ৰীগৰাকীয়ে তেওঁৰ অভিজ্ঞতা ছচিয়েল মিডিয়াত শ্বেয়াৰ কৰিছে। কংগনাই কৈছে যে এই ছবিখন কৰোঁতে তেওঁ বহুতো বাধাৰ সন্মুখীন হৈছিল। তেওঁ ডেংগুতো ভুগিছিল, শৰীৰ অসুস্থ হৈ থকাৰ পিছতো তেওঁ শ্বুটিং কৰিব লগা হৈছিল।
পদ্মশ্ৰী বঁটা বিজয়ী অভিনেত্ৰীগৰাকীয়ে এইটোও দাবী কৰিছে যে ছবিখনৰ ব্যয় বহন কৰিবলৈ তেওঁ নিজৰ সকলো সম্পত্তি বন্ধক ৰাখিব লগা হৈছিল।
এটা শেহতীয়া সাক্ষাৎকাৰত কংগনাই কয়, "মই প্ৰতিমুহূৰ্তত প্ৰত্যাহ্বানটো গ্ৰহণ কৰি আহিছো। যেতিয়া মই মুম্বাইত ভৰি ৰাখিছিলো, মোৰ লগত মাত্ৰ ৫০০ টকা আছিল। গতিকে মই সৰ্বস্বান্ত হৈ গ’লেও পুনৰ সঞ্চয় কৰাৰ সাহস আছে। টকা আৰু সম্পত্তি মোৰ বাবে ডাঙৰ নহয়। এইবোৰৰ কোনো অৰ্থ নাই।"
কংগনা ৰাণাৱটে ২০২১ চনত 'ইমাৰ্জেন্সি' বোলছবিখন ঘোষণা কৰিছিল। 'গেংষ্টাৰ' খ্যাত অভিনেত্ৰীগৰাকীয়ে ছবিখনত দেশৰ অন্যতম চৰ্চিত প্ৰধানমন্ত্ৰী ইন্দিৰা গান্ধীৰ চৰিত্ৰত অভিনয় কৰিছে। অন্যান্য গুৰুত্বপূৰ্ণ চৰিত্ৰবোৰ হৈছে অনুপম খেৰ, শ্ৰেয়াছ তালপাদে, মহিমা চৌধুৰী আৰু মিলিন্দ সোমন। ছবিখন এই বছৰতে মুক্তি পাব।
Continue Reading
