হোজাইৰ নভঙাত চাঞ্চল্যকৰ ঘটনা! পৰকীয়া প্ৰেমৰ বাবে এগৰাকী বোৱাৰীক হত্যা যুৱকৰ

ডিজিটেল ডেস্ক: হোজাইৰ নভঙাত পৰকীয়া প্ৰেমৰ বাবে সংঘটিত হৈছে লোমহৰ্ষক হত্যাকাণ্ড ৷ ২ অক্টোবৰৰ নিশা কামপুৰ বকুলগুৰিৰ এগৰাকী বোৱাৰীক চুৰিৰে উপৰ্যুপৰি আক্ৰমণ কৰি হোজাইৰ নভঙাত পেলাই থৈ যায় প্ৰেমিকে৷ পুৱা স্থানীয় ৰাইজে প্ৰত্যক্ষ কৰি মুমূর্ষু অৱস্থাত বোৱাৰী গৰাকীক চিকিৎসালয়ত ভৰ্তি কৰে যদিও চিকিৎসাধীন অৱস্থাত মৃত্যু হয় বোৱাৰীগৰাকীৰ৷ 

মৃত বোৱাৰীগৰাকীৰ নাম অৰ্চনা বেগম৷ জানিব পৰা মতে নজমূল হক নামৰ গাঁৱৰে এজন যুৱকৰ সৈতে দীৰ্ঘদিন ধৰি প্ৰেমৰ সম্পৰ্ক আছিল মৃত বোৱাৰী গৰাকীৰ৷ দুয়োৰে মাজত কিবা কথাত কাজিয়াৰ সূত্ৰপাত হোৱাত ২ অক্টোবৰৰ নিশা লগৰ এজন বন্ধুক লগত লৈ প্ৰলোভন দি বোৱাৰীগৰাকীক নি ধৰ্ষণ কৰি হত্যা কৰাৰ অভিযোগ বোৱাৰীগৰাকীৰ পৰিয়ালৰ৷ 

ইতিমধ্যে হত্যাকাৰী নজমূল হক আৰু বন্ধু মিনাৰূলৰ বিৰূদ্ধে যোগীজান আৰক্ষী চকীত এজাহাৰ দাখিল কৰিছে স্বামীয়ে ৷ দুই হত্যাকাৰী বৰ্তমান পলাতক যদিও আৰক্ষীয়ে দোষীৰ বিৰুদ্ধে কোনো ব্যৱস্থা গ্ৰহণ নকৰাৰ গুৰুতৰ অভিযোগ উত্থাপন হৈছে। শীঘ্ৰেই দোষীক কৰায়ত্ত কৰি উচিত শাস্তি দিবলৈ দাবী জনাইছে স্থানীয় লোকে।