হাচিফা খানমক নিজৰ কন্যাৰূপে স্বীকৃতি দি আজমলে ল’লে আজীৱন শিক্ষাৰ দায়িত্ব

ডিজিটেল ডেস্ক: কেন্সাৰৰ দৰে দুৰাৰোগ্য ৰোগেও হাৰ মানিলে হাচিফা খানম নামৰ এই গৰাকী শিক্ষাৰ্থীৰ ওচৰত৷ হোজাই জিলাৰ যোগীজানৰ এটি দৰিদ্ৰ পৰিয়ালৰ কন্যা হাচিফা খানমে এইবাৰ হাইস্কুল শিক্ষান্ত পৰীক্ষাত অৱতীৰ্ণ হৈ ৬৯.৫০ শতাংশ নম্বৰ লাভ কৰি সকলোৰে দৃষ্টি আকৰ্ষণ কৰিলে৷ 

আজিৰ পৰা প্ৰায় ৭ বছৰ পূৰ্বে লিউকোমিয়া ৰোগত আক্ৰান্ত হৈছিল শিক্ষাৰ্থীগৰাকী৷ মৌলানা বদৰুদ্দিন আজমলে আজমলৰ কেন্সাৰ কেয়াৰ আঁচনিৰ জৰিয়তে প্ৰায় ৭-৮ লাখ টকা খৰছ কৰি কিশোৰীগৰাকীক চিকিৎসা কৰি সুস্থ কৰিছিল যদিও বৰ্তমানেও চিকিৎসা চলি আছে কিশোৰীগৰাকীৰ৷

জীৱনত কিবা কৰাৰ হেঁপাহ আৰু মনৰ উদ্যমেৰে লিউকোমিয়া ৰোগৰ সৈতে যুঁজি যুঁজি অধ্যয়নত ব্যস্ত আছিল দিন হাজিৰা কৰা পিতৃৰ কন্যাগৰাকীয়ে৷

এইবাৰ হাইস্কুল শিক্ষান্ত পৰীক্ষাত অৱতীৰ্ণ হৈ প্ৰায় ৬৯.৫০ শতাংশ নম্বৰেৰে উজলি উঠিল হাচিফা খানম৷ 

আজি মৌলানা বদৰুদ্দিন আজমলে শিক্ষাৰ্থীগৰাকীক কাষত পাই হুকহুকাই কান্দি উঠিল৷ আজমলৰ সহায়ৰ কথা মনত পেলাই লগতে হুকহুকাই কান্দিলে শিক্ষাৰ্থীগৰাকীৰ লগতে তাইৰ দৰিদ্ৰ পিতৃয়েও৷ 

আৰ্থিক অভাৱৰ বাবে শিক্ষাৰ্থীগৰাকীয়ে কোনো কলেজত নামভৰ্তি কৰিব নোৱাৰাৰ কথা জানিব পাৰি শিক্ষাৰ্থীগৰাকীক নিজৰ কন্যা হিচাপে স্বীকৃতি দি শিক্ষাৰ্থী গৰাকীৰ আজীৱন শিক্ষাৰ দায়িত্ব ল’লে আজমলে৷